Psalms 56

¹Vir die koorleier: op die wysie van “Die duif in die hoë bome”. Van Dawid. 'n Gedig, na aanleiding daarvan dat die Filistyne hom in Gat gevange geneem het.

²Wees my genadig, o God, want daar is mense wat my jaag, vyande wat my vervolg van die môre tot die aand.

³Vroeg en laat jaag my teëstanders my, en ek het baie vyande, o Allerhoogste.

⁴Die dag as ek bang word, vertrou ek net op U.

⁵In God, wie se woord ek prys, in God stel ek my vertroue, ek is nie bang nie. Wat kan 'n blote mens aan my doen?

⁶Hulle vergal my lewe gedurig met beskuldigings teen my, al hulle bose planne is teen my gerig.

⁷Hulle lê op die loer en hou my dop, hulle bly op my hakke, so gretig wag hulle op my dood.

⁸Moenie dat hulle ongestraf bly vir hierdie vyandigheid nie! Laat u toorn hulle vernietig, o God!

⁹My ellende het nie ongemerk by U verbygegaan nie, U het op my trane gelet. In u boek staan hulle opgeteken.

¹⁰Die dag wanneer ek na U roep om hulp, val my vyande terug. Dít weet ek: God is aan my kant.

¹¹In God, wie se woord ek prys, in die Here, wie se woord ek prys,

¹²in God stel ek my vertroue, ek is nie bang nie. Wat kan 'n mens aan my doen?

¹³Ek moet my geloftes aan U nakom, o God, ek wil U met dankoffers betaal,

¹⁴want U het my van die dood gered, my voet nie laat struikel nie, en met God by my kon ek my pad aanhou loop en die lewenslig bly sien.