Psalms 57

¹Vir die koorleier: op die wysie van “Moet dit nie verwoes nie!” Van Dawid. 'n Gedig, na aanleiding daarvan dat hy vir Saul in die grot in gevlug het.

²Wees my genadig, o God! Wees my genadig, want by U soek ek skuiling. Onder u vleuels sal ek skuil tot die bedreiging verby is.

³Ek roep na God, die Allerhoogste, na God wat my sal help.

⁴Hy sal uit die hemel antwoord en my red, Hy sal dié wat my jaag, die stryd laat verloor. Sela God sal antwoord in sy liefde en trou.

⁵Ek is hier tussen leeus, tussen mense wat my wil verskeur. Hulle tande is spiese en pyle, hulle tonge is skerp swaarde.

⁶Toon u grootheid, o God, hoog bo die hemel, u mag hoog bo die aarde.

⁷Hulle het 'n strik vir my voete gespan, hulle wou my breek, hulle het 'n gat vir my gegrawe, maar self daarin geval. Sela

⁸Ek voel weer veilig, o God! Ek voel weer veilig! Ek wil 'n lied sing, ja, ek wil sing.

⁹Ek wil vroeg opstaan, met harp en lier wil ek die rooidag wakker maak!

¹⁰Onder die volke wil ek U loof, Here, onder die nasies u lof besing,

¹¹want u liefde reik tot in die hemel, u trou tot in die wolke!

¹²Toon u grootheid, o God, hoog bo die hemel, hoog bo die aarde u mag.