Psalms 60

¹Vir die koorleier: op die wysie van “Die lelie”. 'n Getuienis. 'n Gedig van Dawid, vir onderwys bedoel,

²na aanleiding van sy geveg teen die Arameërs van Mesopotamië en die Arameërs van Soba toe Joab twaalf duisend Edomiete in die Soutvlakte verslaan het.

³U het ons verstoot, o God, ons uitmekaar geskeur. U was kwaad vir ons. Laat dit tog weer met ons goed gaan.

⁴U het die land laat bewe en dit oopgekloof. Genees tog die wonde, want ons gaan tot niet.

⁵U het 'n ramp oor u volk gebring, U het ons wyn laat drink wat ons laat steier het.

⁶Trek tog u dienaars saam onder u vaandel dat hulle veilig kan wees teen die boog van die vyand. Sela

⁷Red ons deur u groot mag, en help ons, sodat hulle vir wie U liefhet, gered kan word.

⁸God het in sy heilige woning gesê: “As oorwinnaar sal Ek Sigem verdeel en die Sukkotlaagte uitdeel!

⁹Aan My behoort Gilead, aan My behoort Manasse! Efraim is my vernaamste vesting, Juda my koninklike gebied.

¹⁰Moab is tot my beskikking, Edom neem Ek in besit, oor Filistea juig Ek as oorwinnaar.”

¹¹Wie sal ons na Edom toe lei, ons bring na sy versterkte stad?

¹²U het ons verstoot, o God, U trek nie saam met ons leërs uit nie, o God!

¹³Help U ons tog teen die vyand, want die hulp van mense — dit is niks.

¹⁴Met God aan ons kant sal ons oorwin, Hy self sal ons vyande vertrap.