Psalms 61

¹Vir die koorleier: met snarespel. Van Dawid.

²Hoor tog my hulpgeroep, o God, slaan tog ag op my gebed.

³Ver uit die vreemde uit, in wanhoop, roep ek na U. Bring my op 'n rots waar ek veilig sal wees.

⁴U is vir my 'n toevlug, 'n sterk vesting buite bereik van die vyand.

⁵Laat my by U 'n blywende tuiste vind. Laat my skuil onder u vleuels. Sela

⁶U, o God, hoor my geloftes, U vervul die wens van hulle wat u Naam eer.

⁷Laat die koning lank lewe, laat sy lewensjare oor geslagte strek.

⁸Mag hy sy lewe lank regeer voor God, mag u liefde en trou hom bewaar!

⁹Dan sal ek u Naam altyd besing en dag na dag my geloftes betaal.