Psalms 72

¹Van Salomo. Leer tog die koning, o God, om te regeer volgens u wil, leer die koning om die reg te handhaaf soos U dit wil,

²sodat hy regverdige beslissings oor u volk sal vel en aan die verdruktes reg laat geskied.

³Laat berge en rante hulle verbly oor die vrede en reg vir die volk.

⁴Laat die koning die reg van die verdruktes onder die volk beskerm, laat hy armes te hulp kom en verdrukkers verbrysel,

⁵sodat die mense U kan dien so lank as die son en die maan daar is, van geslag tot geslag.

⁶Mag die koning vir sy mense wees soos die reën vir die plante, soos swaar reëns wat die aarde deurdrenk.

⁷Mag die reg onder sy regering floreer en mag daar vir altyd groot voorspoed wees.

⁸Mag hy heers van see tot see, van die Eufraat af tot in verre lande.

⁹Mag die woestynbewoners voor hom kniel en sy vyande voor hom in die stof kruip.

¹⁰Mag die konings van Tarsis en die kuslande geskenke bring, die konings van Skeba en Seba aan hom belasting betaal.

¹¹Mag alle konings voor hom buig en al die nasies hom dien.

¹²Hy sal die arme red wat om hulp roep, die verdrukte en dié wat geen helper het nie;

¹³hy sal hom oor die swakke en die behoeftige ontferm, die lewens van die arm mense beskerm.

¹⁴Hy sal hulle van onderdrukking en geweld bevry; hulle lewens sal kosbaar wees in sy oë.

¹⁵Mag die koning lank lewe, mag daar vir hom goud uit Skeba gebring word; mag die mense gedurig vir hom bid en die hele dag seënbedes vir hom uitspreek.

¹⁶Mag daar volop graan in die land wees, mag dit selfs bo-op die bergtoppe wuif, mag die oes so welig wees soos die Libanon, die graan so geil opskiet soos gras in die veld.

¹⁷Mag die koning se naam altyd onthou word, mag sy roem duur so lank as die son daar is, sodat al die nasies hulle in sy regering verlustig en hom prys!

¹⁸Geloof sy God die Here, die God van Israel. Dit is net Hy wat magtige dade doen!

¹⁹Mag sy verhewe Naam vir altyd geloof word, mag die hele wêreld vol wees van sy majesteit. Amen, ja, amen.

²⁰Hier eindig die gebede van Dawid, seun van Isai.