Psalms 76

¹Vir die koorleier: met snarespel. 'n Psalm van Asaf. 'n Lied.

²God het Hom in Juda bekend gemaak, sy Naam is groot in Israel;

³sy tuiste is in Salem, sy woning op Sion.

⁴Daar het Hy die brandpyle, die skild en die swaard vernietig, die aanval van die vyand afgeslaan. Sela

⁵Die glans waarmee U verskyn het, was skitterender as dié op die hoogste berge.

⁶Die dapper soldate van die vyand is in hulle slaap oorval en geplunder; nie een van die krygsmanne kon 'n hand oplig nie.

⁷Toe U ingegryp het, God van Jakob, was strydwa en perd daarmee heen.

⁸As u toorn ontbrand, laat U die mens sidder en beef. Wie kan dan voor U staan?

⁹Uit die hemel het U u uitspraak bekend gemaak. Die mensdom het bang geword en stilgebly

¹⁰toe God gekom het om te oordeel, om al die hulpeloses op die aarde te red. Sela

¹¹Ook die woede van 'n mens dien u lof, selfs die laaste reste van die woede gebruik U in u diens.

¹²Bring aan die Here julle God die dankoffers wat julle belowe het! Almal rondom Hom moet geskenke bring vir die Ontsagwekkende,

¹³vir Hom wat die oormoed van maghebbers breek, vir Hom voor wie die konings van die aarde sidder.