Psalms 77

¹Vir die koorleier. Ter herinnering. Van Asaf. 'n Psalm.

²Ek roep na God om hulp, ek roep na God, want Hy sal my hoor.

³In my nood soek ek hulp by die Here; ook in die nag bly my hande in gebed uitgestrek sonder om moeg te word; maar ek vind geen troos nie.

⁴Ek dink aan God en ek sug, ek dink na en ek is verslae. Sela

⁵U laat my wakker lê, ontsteld en sprakeloos.

⁶Ek dink aan vroeër dae, aan jare lank gelede.

⁷As ek so in die nag lê en terugdink en peins, vra ek my af:

⁸“Sal die Here vir altyd verstoot en nooit weer genade betoon nie?

⁹Het daar vir altyd 'n einde gekom aan sy trou? Geld sy beloftes dan glad nie meer nie?

¹⁰Het God vergeet om medelye te hê? Het Hy in sy toorn sy ontferming onttrek?” Sela

¹¹En ek sê: “My grootste smart is dat die Allerhoogste nie handel soos voorheen nie.”

¹²Ek wil dink aan die dade van die Here, ja, ek wil dink aan u wonderdade van vroeër.

¹³Ek wil nadink oor al u werk en oor al u dade peins.

¹⁴Alles wat U doen, is heilig, o God. Waar is 'n god so groot soos God?

¹⁵U is die God wat wonderdade doen; U het u mag onder die volke geopenbaar.

¹⁶U het u volk deur u krag gered, die kinders van Jakob en Josef. Sela

¹⁷Toe die waters U sien, o God, toe die waters U sien, het hulle gebewe, die diep waters het gesidder.

¹⁸Die wolke het water uitgegiet, uit die donderwolke het dit gedreun, u weerligte het in alle rigtings geblits.

¹⁹U donderslae het die lugruim gevul, weerligstrale het die wêreld verlig, die aarde het geskud en gebewe.

²⁰U het deur die see gekom, u weg deur magtige waters gebaan. Niemand het u spoor gesien nie.

²¹U het u volk soos 'n kudde gelei deur die hand van Moses en Aäron.