Psalms 90

¹'n Gebed van Moses, die man van God. Here, U was vir ons 'n toevlug van geslag tot geslag.

²Voordat die berge gebore is, voordat U die wêreld voortgebring het, ja, van ewigheid tot ewigheid is U God!

³U laat die mens sterwe: U sê net: “Word weer stof!”

⁴Duisend jaar is vir U soos gister as dit verby is, soos een enkele wagbeurt in die nag.

⁵U maak 'n einde aan 'n mens, hy gaan die doodslaap in. Hy is soos gras wat in die môre afgesny word:

⁶in die môre is dit nog groen, maar dit word afgesny en teen die aand is dit verlep en dit verdroog.

⁷Ons vergaan onder u toorn, ons gaan te gronde onder u gramskap.

⁸U sien ons oortredinge raak, U bring die sondes wat ons wou wegsteek, aan die lig.

⁹Onder u toorn vlieg ons dae en skiet ons jare verby soos 'n gedagte.

¹⁰Ons lewe maar sewentig jaar, of, as ons baie sterk is, tagtig, en dié is vol swaarkry en leed. Dit is gou verby, ons vlieg na ons einde toe.

¹¹Wie ken die krag van u toorn beter as u dienaars? Wie ken u gramskap beter?

¹²Leer ons ons dae so gebruik dat ons wysheid bekom.

¹³Hoe lank nog, Here, voordat U ons te hulp kom? Ontferm U tog oor ons.

¹⁴Skenk ons elke dag u liefde in oorvloed, dat ons ons lewe lank mag juig en bly wees.

¹⁵Soveel dae as dié waarin U ons verdruk het, soveel jare as dié waarin ons gely het, gee ons soveel jare van blydskap.

¹⁶Laat u werk vir ons duidelik word en u grootheid vir ons kinders.

¹⁷Laat ons die goedheid van die Here ons God belewe: hou die werk van ons hande in stand, ja, die werk van ons hande, hou dit in stand.