Psalms 92

¹'n Psalm. 'n Lied vir die sabbatdag.

²Dit is goed om die Here te loof, om u Naam te besing, Allerhoogste,

³om elke môre van u liefde te getuig, en elke aand van u trou,

⁴om dit te doen met snaarinstrumente, met harp en lier.

⁵U groot dade, Here, het my baie bly gemaak, ek wil juig oor wat U gedoen het.

⁶Groots is alles wat U doen, Here, ondeurgrondelik u gedagtes.

⁷Wie dit nie besef nie, is 'n dom mens, wie dit nie insien nie, is sonder verstand.

⁸Al is die goddelose voorspoedig, al floreer almal wat onreg doen, hulle sal vir goed uitgewis word.

⁹U regeer vir ewig, Here,

¹⁰en dit staan vas: u vyande sal uitgedelg word, Here, almal wat onreg doen, sal vernietig word.

¹¹Maar vir my gee U krag soos dié van 'n buffel, U laat my 'n oorwinningsfees vier.

¹²Ek kyk op my teëstanders neer, ek luister sonder vrees na die mense wat niks ontsien nie, wat in opstand teen my is.

¹³Die regverdiges sal sterk wees soos palmbome, soos hoë seders op die Libanon.

¹⁴Hulle vind hulle krag in die huis van die Here en groei op in die tempel van ons God.

¹⁵Selfs in hulle ouderdom sal hulle nog toeneem in krag. Hulle sal fris en lewenskragtig wees.

¹⁶So sal blyk dat die Here regverdig is, dat daar by Hom geen onreg is nie. Hy is my rots.