Proverbs 28

¹Die goddelose hardloop weg al jaag niemand hom nie; die regverdiges het die moed van 'n leeu.

²As daar opstand is in 'n land, is daar baie wat na mag gryp; as daar iemand met wysheid en kennis is, bly hy lank aan die bewind.

³'n Man wat self arm is en arm mense uitbuit, is soos 'n reën wat alles verspoel, sodat daar niks te ete oorbly nie.

⁴Wie die wet van die Here verontagsaam, praat met lof van goddelose mense; wie die wet onderhou, beveg hulle.

⁵Slegte mense het geen begrip van wat reg is nie; dié wat na die wil van die Here vra, het 'n goeie begrip van alles.

⁶Liewer arm wees en eerbaar lewe as oneerlik lewe en ryk wees.

⁷'n Verstandige seun hou hom aan die wet van die Here; as die seun maats maak met mense wat vir niks eerbied het nie, bring hy skande oor sy vader.

⁸Wie groot rykdom versamel deur mense uit te buit, versamel dit vir iemand wat hom oor arm mense sal ontferm.

⁹As iemand hom doof hou vir die wet van die Here, sal die Here 'n afsku hê van so 'n man se gebed.

¹⁰Wie eerlike mense mislei sodat hulle die verkeerde pad loop, sal self in die gat val wat hy gegrawe het; die opregte sal voorspoed geniet.

¹¹'n Ryk man kan dink hy het die wysheid in pag, maar 'n arm mens met insig sien deur hom.

¹²As regverdiges rede tot blydskap het, praat almal met trots daaroor, as goddelose mense aan die bewind kom, kruip die mense weg.

¹³Wie sy sonde wegsteek, moet niks goeds te wagte wees nie; wie sy sonde bely en daarvan afsien, sal genade ontvang.

¹⁴Dit gaan goed met 'n mens wat altyd versigtig is; maar iemand wat moedswillig is, sal ondergaan.

¹⁵'n Brullende leeu, 'n beer wat wil rondstorm, so is 'n goddelose regeerder oor 'n weerlose volk.

¹⁶As 'n heerser verstandigheid kortkom, is daar baie verdrukking; wie uitbuiting haat, lewe lank.

¹⁷'n Man wat moord op sy gewete het, moet op die vlug bly tot sy dood toe. Niemand moet hom help nie.

¹⁸Wie 'n eerbare lewe lei, sal hulp ontvang; wie 'n oneerlike lewe lei, sal onverwags tot 'n val kom.

¹⁹Wie sy grond bewerk, het volop om te eet; wie hom besig hou met nuttelose dinge, word brandarm.

²⁰'n Betroubare man is baie voorspoedig; een wat gou ryk wil word, sal sy straf kry.

²¹Dit is nie reg dat mense partydig is en sondig nie, selfs nie ter wille van 'n stukkie kos nie.

²²'n Inhalige mens wil gou ryk word; hy besef nie dat daar vir hom gebrek wag nie.

²³Wie iemand teregwys, kry eerder agterna dank as wat 'n vleier dit kry.

²⁴Wie sy ouers besteel en sê: “Ek doen niks verkeerds nie,” is niks anders as 'n rower nie.

²⁵'n Gierige mens veroorsaak rusie; een wat op die Here vertrou, is voorspoedig.

²⁶Wie op homself vertrou, is 'n dwaas; wie hom deur wysheid laat lei, is veilig.

²⁷Wie vir 'n arm mens iets oor het, sal self niks kortkom nie, maar wie anderpad kyk, sal baie verwensings hoor.

²⁸As goddelose mense aan die bewind kom, kruip die mense weg, as die goddeloses ondergaan, kry die regverdiges die mag.