Proverbs 29

¹'n Man wat hom bly verset teen teregwysings, kom skielik tot 'n val en staan nie weer op nie.

²'n Volk juig as regverdige mense die mag kry; 'n volk sug as 'n goddelose mens regeer.

³'n Man wat wysheid hoog aanslaan, maak sy vader gelukkig; een wat hom met prostitute ophou, vermors sy besittings.

⁴'n Koning wat reg laat geskied, maak 'n land veilig; een wat net belastings oplê, ruïneer 'n land.

⁵'n Man wat 'n ander vlei, is besig om hom in 'n strik te laat loop.

⁶'n Mens se sonde is sy grootste gevaar. Iemand wat reg doen, kan vrolik sing.

⁷'n Regverdige mens is besorg oor die reg van arm mense, 'n goddelose mens het nie begrip vir dié besorgdheid nie.

⁸Ligsinnige mense bring 'n stad in oproer; wyse mense kalmeer die gemoedere.

⁹Wanneer 'n wyse man 'n saak maak teen 'n dwaas, raak die dwaas opgewonde en beledigend, en kom daar nie vrede nie.

¹⁰Moordenaars haat 'n onskuldige mens; mense wat reg lewe, probeer sy lewe red.

¹¹'n Dwaas gee vrye teuels aan sy woede; 'n wyse mens kry die dwaas naderhand gekalmeer.

¹²'n Regeerder wat hom aan leuens steur, het naderhand net goddeloses in sy diens.

¹³'n Arm mens en sy verdrukker het een ding gemeenskaplik: die Here hou hulle altwee in die lewe.

¹⁴As 'n koning reg aan arm mense laat geskied, sal hy lank regeer.

¹⁵'n Pak slae en 'n teregwysing bring wysheid; 'n kind wat sonder dissipline grootword, steek sy moeder in die skande.

¹⁶As goddelose mense regeer, regeer die sonde ook, maar die mense wat die wil van die Here doen, sal sien hoe die goddeloses ondergaan.

¹⁷Gee jou seun 'n goeie opvoeding en jy sal gerus wees oor hom; hy sal jou baie vreugde verskaf.

¹⁸Waar die wil van die Here nie bekend gemaak word nie, verwilder 'n volk; dit gaan goed met elkeen wat die wet van die Here onderhou.

¹⁹Met woorde alleen laat 'n slaaf hom nie waarsku nie; hy verstaan wat jy sê, maar hy reageer nie.

²⁰Jy sien self: vir die man wat praat sonder om eers te dink, is daar minder hoop as vir 'n dwaas.

²¹As jy 'n slaaf van kleins af bederf, is hy rebels as hy groot is.

²²'n Opvlieënde mens veroorsaak rusie; iemand wat kort van draad is, doen sonde op sonde.

²³Hoogmoed bring 'n mens tot 'n val; nederigheid bring eer.

²⁴Iemand wat gesteelde goed ontvang, gee nie om vir sy lewe nie; hy weet die vloek sal hom tref, maar hy wil nie praat nie.

²⁵As jy vir mense bang is, kan jy in 'n strik beland, maar as jy jou vertroue in die Here stel, is jy veilig.

²⁶Almal soek die guns van die regeerder, maar dit is die Here wat aan 'n mens reg laat geskied.

²⁷Mense wat die wil van die Here doen, het 'n afsku in iemand wat onwys optree; 'n goddelose mens het 'n afsku in dié wat reg lewe.