Matthew 23

¹Toe het Jesus die menigte en sy dissipels toegespreek

²en gesê: “Die skrifgeleerdes en die Fariseërs het die gesag om die wet van Moses te vertolk.

³Julle moet alles doen en onderhou wat hulle vir julle sê, maar hulle voorbeeld moet julle nie navolg nie, want hulle doen self nie wat hulle sê nie.

⁴Hulle bind swaar en ondraaglike laste saam en sit dit op die mense se skouers, maar self wil hulle nie 'n vinger verroer om dit te dra nie.

⁵Alles wat hulle doen, doen hulle net om deur mense gesien te word. Hulle maak die gebedsband om hulle voorkop breed, en die tossels aan hulle klere groot.

⁶Hulle hou van die ereplekke by die feesmaaltye, en van die voorste plekke in die sinagoges

⁷en om op straat deur die mense begroet en as ‘rabbi’ aangespreek te word.

⁸“Maar julle moet julle nie ‘rabbi’ laat noem nie; net Een is julle Leermeester en julle is almal broers.

⁹Moet niemand hier op aarde as ‘vader’ aanspreek nie, want Een is julle Vader: die Vader in die hemel.

¹⁰Julle moet julle nie ‘leiers’ laat noem nie, want Een is julle Leier: die Christus.

¹¹“Maar die grootste onder julle moet bereid wees om die ander te dien.

¹²Wie hoogmoedig is, sal verneder word, en wie nederig is, sal verhoog word.”

¹³“Ellende wag vir julle, skrifgeleerdes en Fariseërs, huigelaars! Julle sluit die deur van die koninkryk in die mense se gesig toe. Julle gaan self nie in nie, en julle verhinder dié wat wel wil ingaan.

¹⁴***

¹⁵“Ellende wag vir julle, skrifgeleerdes en Fariseërs, huigelaars! Julle trek oor see en land rond om een bekeerling te maak, en as hy dit word, maak julle hom twee maal so ryp vir die hel as wat julle self is.

¹⁶“Ellende wag vir julle, julle wat ander wil lei en self blind is. Julle sê: ‘As iemand by die tempel 'n eed aflê, is hy nie aan sy eed gebind nie, maar as hy by die goud van die tempel 'n eed aflê, moet hy die eed nakom.’

¹⁷Blinde dwase! Wat is belangriker: die goud of die tempel waardeur die goud geheilig word?

¹⁸Julle sê ook: ‘As iemand by die altaar 'n eed aflê, is hy nie aan sy eed gebind nie, maar as hy by die offergawe bo-op die altaar 'n eed aflê, moet hy die eed nakom.’

¹⁹Julle blindes! Wat is belangriker: die offergawe of die altaar waardeur die offergawe geheilig word?

²⁰Wie by die altaar 'n eed aflê, lê 'n eed af by die altaar en by alles wat daarop is.

²¹Wie by die tempel 'n eed aflê, lê 'n eed af by die tempel en by God wat daarin woon.

²²En wie by die hemel 'n eed aflê, lê 'n eed af by die troon van God en by God wat daarop sit.

²³“Ellende wag vir julle, skrifgeleerdes en Fariseërs, huigelaars! Julle gee tiendes van kruisement, anys en koljander, maar wat volgens die wet van God die swaarste weeg, laat julle na: geregtigheid, barmhartigheid en betroubaarheid. Juis hierdie dinge moet 'n mens doen en die ander nie nalaat nie.

²⁴Blinde leiers! Julle skep die muggie uit julle beker uit, maar julle sluk die kameel in.

²⁵“Ellende wag vir julle, skrifgeleerdes en Fariseërs, huigelaars! Julle maak die buitekant van die beker en die skottel skoon, maar binne is hulle vol hebsug en onmatigheid.

²⁶Blinde Fariseër, maak eers die binnekant van die beker skoon, dan sal sy buitekant ook skoon wees.

²⁷“Ellende wag vir julle, skrifgeleerdes en Fariseërs, huigelaars! Julle is soos witgeverfde grafte, wat van buite mooi lyk maar daarbinne vol doodsbene en allerhande onsuiwerheid is.

²⁸So is julle ook: van buite lyk julle vir mense vroom, maar van binne is julle vol huigelary en minagting van die wet.”

²⁹“Ellende wag vir julle, skrifgeleerdes en Fariseërs, huigelaars! Julle hou die grafte van die profete in stand en versier die gedenktekens van die vromes,

³⁰en julle sê: ‘As ons in die dae van ons voorvaders gelewe het, sou ons nie medepligtig gewees het aan die vergieting van die bloed van die profete nie.’

³¹Op dié manier erken julle self dat julle nakomelinge is van die moordenaars van die profete.

³²Gaan maar aan, maak klaar wat julle voorvaders begin het!

³³“Julle slange, addergeslag! Hoe sal julle ontkom aan die straf in die hel?

³⁴Luister dus goed! Ek stuur profete, wyse manne en leraars na julle toe. Julle sal party van hulle doodmaak en kruisig, en party in julle sinagoges gesel en hulle van die een dorp na die ander vervolg.

³⁵So sal julle verantwoordelik wees vir die bloed van al die vromes wat op die aarde uitgestort is, van die bloed van die onskuldige Abel af tot by die bloed van Sagaria seun van Berekja, vir wie julle tussen die tempel en die altaar vermoor het.

³⁶Dit verseker Ek julle: Die straf vir al hierdie dinge sal op die mense van vandag neerkom.”

³⁷“Jerusalem, Jerusalem! Jy wat die profete doodmaak en die boodskappers stenig wat na jou toe gestuur is, hoe dikwels wou Ek jou kinders bymekaarmaak soos 'n hen haar kuikens onder haar vlerke bymekaarmaak, maar julle wou nie!

³⁸Kyk, nou word julle stad as puinhoop aan julle oorgelaat.

³⁹Maar Ek sê vir julle: Julle sal My van nou af sekerlik nie sien nie totdat die dag kom wanneer julle sal uitroep: Loof Hom wat in die Naam van die Here kom! ”