Sotho 1951 Bible - 24 verses
1Eliya wa Thisibe -- Thisibe ke motse wa Gileada -- o kile a bolela le Ahaba a re: Ka bophelo bja Morena Modimo wa Isiraele yo nna ke mo hlankelago, ka nywaga yeno go ka se ke gwa na phoka le ge e le pula, ge e se ka polelo ya ka.
2A tlelewa ke lentšu la Morena la re:
3Tloga mo, o lebe bohlabela, o utame nokeng ya Kirithe mo e hlakanago le noka ya Jorodane.
4O nwe noka yeo; gomme ke laetše magukubu gore a go fepe o le ntshe.
5Eliya a ya a dira ka mo Morena a mmoditšego; a ya a dula nokaneng ya Kirithe mo e hlakanago le Jorodane.
6Gomme magukubu a fela a mo tlela le bogobe le nama ka moswana; ka mantšiboa a mo tlela le nama le bogobe; mme a nwa meetse a nokana yeo.
7Matšatši a feta, nokana yeo ya gopa ka ge go sa ne pula nageng yeo.
8Ke mo a tletšwego ke lentšu la Morena, la re:
9Nanoga o ye Tsarepata dinakaneng tša Sidone, o dule ntshe; o tsebe gore ke laetše mosadi wa mohlologadi gore a go babalele.
10A nanoga a ya Tsarepata. Ya re ge a etla kgorong ya motse, a bona mosadi wa mohlologadi a topelela dikgonyana; a mmitša a re: Nkgele meetsana ka segwana ke nwe.
11Mosadi a sa ya go ga, Eliya a mmitša a re: O ko ntlele le lerathana la bogobe ka seatla sa gago.
12Mosadi a re: Ka bophelo bja Morena Modimo wa gago, ga ke na se ke se apeilego. Se se lego gona pitšeng ke butswana bjo bo kago tlala seatla, le makhuranyana ka legapeng. Bjale ke be ke topelela dikgonyana di se kae, gore ke ikapeele, nna le ngwana wa ka, re je re tsebo ikhwela.
13Eliya a re: Se boife; yaa o dire ka mo o boletšego; fela, thoma go ntirela senkgwanyana o ntlele naso; o kgono ikapeela le ngwana wa gago.
14Gobane Morena Modimo wa Isiraele o re: Bupi bo lego pitšeng bo ka se ke bja fela, le makhura ka legapeng a ka se ke a hlokwa, go be go tle tšatši le Morena a tlogo neša pula ka lona lefaseng.
15Mosadi a ya a dira ka mo Eliya a mmoditšego; Eliya a ja, le yena mosadi a ja, le ba lapeng la gagwe ba ja ka mehla.
16Gomme bupi ka pitšeng bja se ke bja fela; le makhura a se ke a hlokwa legapeng, ka mo Morena a boletšego le Eliya.
17Ya re ge go fetile lebaka, gwa babja ngwana wa mošemanyana wa mosadi eo e lego mong wa lapa; bolwetši bja gola ka maatla, ngwana a ba a fela moya.
18Mosadi a bolela le Eliya a re: Ke sa na le taba mang nago wene monna wa Modimo? A o tlile go nna gore go gopolwe sebe sa ka, le gore ngwana wa ka a hwe?
19Eliya a fetola a re: Nneele ngwana wa gago. A mo tšea difarong tša mmagwe, a mo iša phapošing ya gagwe ya godimo ga ntlo ye a bego a dula go yona, a mo latša malaong a gagwe,
20a rapela Morena a re: Hle Morena Modimo wa ka! Go ya kang ge o hlokofatša mohlologadi ke dulago ga gagwe ka go bolaya morwa wa gagwe?
21A inamela mošimane eo, a dira gararo, a rapela Morena a re: Hle Morena Modimo wa ka! A ko bušetše moya wa mošimanyana e go yena.
22Gomme Morena a kwa se Eliya a se bolelago, moya wa mošimanyana wa boela go yena a phela.
23Eliya a mo tšea, a tšwa nae moo phapošing ya godimo, a mo iša ka ngwakong, a mo nea mmagwe, a re: O ko bone, ngwana wa gago o a phela!
24Mosadi a botša Eliya a re: Bjale gona ke mo ke lemogago ge o le monna wa Modimo; gomme se o se bolelago ke lentšu la Morena ruri.