1 Kings 18

¹Gwa feta matšatši, ya ba nywaga e meraro; ke mo lentšu la Morena le tletšego Eliya la re: Sepela o yo lebana le Ahaba, ka gobane ke rata go neša pula lefaseng.

²Eliya a ya gore a lebane le Ahaba. Tlala yona e be e le e thata nageng ya Samaria.

³Gomme Ahaba a bitša Obadya molaki wa ngwako wa gagwe. Obadya yena o be a boifa Morena gagolo.

⁴Gobane e kile ya re mola Isebele a bolaya baprofeta ba Morena, Obadya a tšea baprofeta ba lekgolo a ba uta mefomeng; go o mongwe a iša ba masome a fetšago seatla, a ba babalela ka bogobe le ka meetse; le go o mongwe a iša ba masome a fetšago seatla.

⁵Ahaba a bolela le Obadya a re: Ralala le naga le didiba tša meetse ka moka le dinoka ka moka; mohlomong re ka hwetša bjang ra phediša dipitsi le dimeila, re se felelwe ke diruiwa.

⁶Ba neana mahlakore a naga ba e ralala. Ahaba a tšea ka tsela ya gagwe a nnoši; Obadya le yena a tšea ka ya gagwe a nnoši.

⁷Ya re ge Obadya a le tseleng, a gahlana le Eliya. Obadya a mo tseba, a khunama a lotšha, a re: A ke wena Eliya mong wa ka?

⁸Eliya a re: Ke nna e. Botša mong wa gago o re: Eliya šo, o fa!

⁹Obadya a re: Ke sentšeng, ge nna mohlanka wa gago o nkgafela seatleng sa Ahaba gore a mpolaye?

¹⁰Ka bophelo bja Morena Modimo wa gago, ga go na setšhaba goba mmušo mo mong wa ka a sa kago a roma bahlanka ba go tsoma; gomme ya re ge ba boa ba re: Ga a gona mo, a eniša mmušo woo le setšhaba seo ka go re: Eliya ga a gona fa!

¹¹Bjale o re: Sepela o botše mong wa gago o re: Eliya šo, o fa!

¹²Gomme e ka re ke ile, Moya wa Morena wa šala o go tloša wa go iša mo ke sa go tsebego, gomme nna ka tlo ba ke boditše Ahaba mme a tla a go hloka, gona o tlo bolaya nna; mola nna mohlanka wa gago, ke boifa Morena go tloga bofseng bja ka.

¹³A wena mong wa ka o ga o a botšwa tše nkilego ka di dira mehla yela ge Isebele a bolaya baporofeta ba Morena, ka mo ke utilego ba bangwe ba baporofeta ba Morena, banna ba lekgolo? Ba masome a mahlano ka ba iša mophomeng o mongwe; go o mongwe ka iša ba masome a mahlano; ka ba babalela ka bogobe le ka meetse?

¹⁴Bjale ge o re: Sepela o botše mong wa gago o re: Elia šo, o fa, a a ka lesa go mpolaya?

¹⁵Eliya a re: Ka bophelo bja Morena wa mašaba yo nna ke mo hlankelago, ke yo lebana nae e sa le lehono le.

¹⁶Ke moka Obadya a yo gahlana le Ahaba, a mmotša taba ye; Ahaba a nanoga a yo gahlana le Eliya.

¹⁷Ahaba ge a lebana le Eliya a re: A o fa wena moferekanya Isiraele?

¹⁸Eliya a re: Moferekanya Isiraele ga se nna; ke wena le leloko la geno, ka ge le lahlile melao ya Morena, mme la latela boBaali.

¹⁹Bjale roma bahlanka ba nkgobokanyetše Baisiraele ka moka thabeng ya Karamele, le baporofeta ba Baali ba makgolo a mane a masome a mahlano, le baporofeta ba makgolo a mane ba Ashera ba ba fepiwago ke Isebele.

²⁰Ahaba a roma bahlanka ba botha Baisiraele ka moka thabeng ya Karamele, ba kgobokanya le baporofeta bao.

²¹Eliya a tla a lebana le setšhaba ka moka a re: Le tlo kgaotša neng go hlotšetša ka dithoko tše pedi? Ge Modimo e le Morena, gona latelang yena; ge Modimo e le Baali, gona o lateleng. Gomme setšhaba sa se ke sa fetola selo.

²²Ke mo Eliya a boletšego le setšhaba a re: Nna ke šetše ke nnoši ke le moporofeta wa Morena; gomme baporofeta ba Baali ke banna ba makgolo a mane a masome a mahlano.

²³Bjale re neeleng dipowana tše pedi: bona ba ikgethele powana ba e pomaganye, ba e bee dikgonyeng, mme ba se ke ba gotša mollo. Gomme nna ke tlo hlaba yela e nngwe ka e bea dikgonyeng, ka se ke ka gotša mollo.

²⁴Lena le tlo bitša leina la modimo wa lena; ge e le nna ke tlo bitša leina la Morena. Gomme Modimo e tlo ba yeo a tlogo araba ka mollo. Setšhaba ka moka sa fetola sa re: O boletše gabotse.

²⁵Bjale Eliya a bolela le baporofeta ba Baali a re: Ikgetheleng powana ya lena, go thome bolena, ka gobane lena le ba bantši. Le bitše leina la modimo wa lena; fela, le se ke la gotša mollo.

²⁶Gomme ba tšea powana ye ba e neetšwego, ba e hlaba, ba nape ba bitša leina la Baali, ba thoma, e sa le ka moswana, ya ba mosegare ba sa fela ba re: Baali, re kwe! Gomme gwa hlokwa phetolo le e a arabago, mola ba sa fela ba tibatiba, ba dikologa le aletare ye ba bego ba e dirile.

²⁷Ya re ge e šetše e le mosegare o mogolo, Eliya a ba kwera a re: Hlabošang lentšu; ka gobane Baali ke modimo; mohlomong o kokobane a ile le mogopolo; mohlomong o ile kgakala, goba o etile; mohlomong o sa ile le boroko, o sa tlo phafoga.

²⁸Bona ba goeletša ka mantšu a magolo, ba dira ka mokgwa wa bona ba itshegaka ka mefaka le ka marumo, ba šala le mekgeledi ya madi.

²⁹Ge mosegare o bile o fetile, e šetše e le lebaka la sehlabelo sa sebego, ke ge ba sa na le malopo; fela, gwa hlokwa phetolo, le e a arabago, le mokwi wa dithapelo.

³⁰Ke mo Eliya a nago a bitša setšhaba ka moka a re: Batamelang fa go nna! Setšhaba ka moka sa batamela mo a bego a le gona. Gomme Eliya a tsoša aletare ya Morena e bego e phušogile.

³¹A tšea maswika a lesome le metšo e mebedi ka palo ya meloko ya barwa ba Jakobo, yo a kilego a tlelwa ke lentšu la Morena la re: Leina la gago e tlo ba Isiraele.

³²A aga aletare ka maswika ao, a dira leineng la Morena, a e dikološa ka lengotswana, a šia sebaka se se kago lekana go bjalwa peu ya ntlatlana tše pedi.

³³A beakanya dikgong, a pomaganya powana yela a e bea dikgonyeng;

³⁴a re: Gang meetse a meeta e mene, le a tšheleng sehlabelong le dikgonyeng. A ba a re: Boeletšang! Ge ba tšhetše, a re: Tšhelang la boraro! Mme ba tšhela la boraro.

³⁵Aletare ya dikologwa ke meetse le lengotswana la tlala meetse.

³⁶Ya re ge go fihlile lebaka la sehlabelo sa sebego, moporofeta Eliya a batamela, mme a re: Morena Modimo wa Aborahama le Isaka le Isiraele! Lehono tsebatša ge Modimo mo go Isiraele e le wena, le gore tše nna mohlanka wa gago ke di dirago, ke di dira ka moka ke laetšwe ke wena.

³⁷O ko arabe, Morena! Araba, gore setšhaba se se tsebe gore Modimo ke wena Morena; gore o sokolle dipelo tša bona.

³⁸A sa tšo realo gwa wa mollo wa Morena, wa fiša sehlabelo le dikgong le maswika le mabu, wa pšhiša meetse a mo lengotswaneng.

³⁹Setšhaba ge se bona dilo tše, sa khunama sa inamela fase; ka moka ba re: Modimo ke Morena! Modimo ke Morena!

⁴⁰Bjale Eliya a ba laela a re: Swarang baporofeta ba Baali, go se be le e a phonyokgago! Ba ba swara; Eliya a ba iša nokaneng ya Kisoni a ba bolaela ntshe.

⁴¹Ke mo Eliya a boditšego Ahaba a re: Rotoga, o je o nwe; go kwala modumo wa pula.

⁴²Ahaba a rotoga a yo ja a nwa; Eliya yena a namela a ya ntlheng ya thaba ya Karamele, a dula fase, sefahlogo sa gagwe a se inametša mo gara matolo a gagwe.

⁴³A roma lesogana la gagwe a re: Rotoga o lebelele thoko ya lewatle. Lesogana la rotoga la lebelela, la re: Ga go selo! Eliya a re: Boelela, o dire gašupa.

⁴⁴Gomme ka la go šupa lesogana la re: Lerunyana šelelee, le le lekanago le seatla sa motho; le rotoga le etšwa lewatleng. Eliya a re: Sepela o botše Ahaba o re: Bofa koloi, pula e se tlo go swara.

⁴⁵Ke ge legodimo le šetše le fifala ka maru le ka ledimo; gwa tla pula e kgolo. Ahaba yena o be a tlogile ka koloi a leba Jeseriele.

⁴⁶Ge e le Eliya, yena seatla sa Morena se be se le godimo ga gagwe, a itlema matheka, a kitima a le pele ga Ahaba, a ba a fihla Jeseriele.