2 Kings 22

¹Josia ge a thoma go buša o be a na le nywaga e seswai; o feditše nywaga e masome a mararo a motšo o tee a le kgoši motseng wa Jerusalema. Leina la mmagwe e be e le Jedida morwedi wa Adaya wa Bosikata.

²O dirile tše di kgahlilego Morena mo go fela, a tšea ka tsela ya Dafida tatagwe, a se ke a arogela ka mo go le letona le ge e le go la ntsogošo.

³Ka ngwaga wa lesome le metšo e seswai wa pušo ya gagwe, o kile a roma Safane mongwadi morwa wa Atsalia morwa wa Mesulama, a re a ye Ngwakong wa Morena, a re:

⁴Rotogela go Hilikia moperisita e mogolo, o re a bale ditšhelete tše di tlišitšwego Ngwakong wa Morena. Tše baleti ba mojako ba di kgobetšego go setšhaba.

⁵A a di neele bahlapetši ba modiro diatleng, ba ba beilwego go laka Ngwako wa Morena; bona ba nee badiri ba mediro ba mo Ngwakong wa Morena, ba ba lokišago mo Ngwako o onalago.

⁶E lego babetli ba dikwata, le baagi ba maboto, ba reke dikwata le mafsika a go betlwa a go lokiša Ngwako.

⁷Fela, ditšhelete tše ba neelwago diatleng, di se ke tša balwa; ba dire ka go ba bota.

⁸Ke mo moperisita e mogolo Hilikia a boditšego Safane mongwadi a re: Nna ke hweditše puku ya melao fa Ngwakong wa Morena. Gomme Hilikia a neela Safane puku yeo, a re a e bale.

⁹Safane mongwadi a tla go kgoši a e anegela a re: Bahlanka ba gago ba kgobetše ditšhelete tše ba di hweditšego Ngwakong wa Morena, gomme ba di neetše bahlapetši ba mediro diatleng, e lego bona balaki ba Ngwako wa Morena.

¹⁰Safane mongwadi a tsebo botša kgoši a re: Hilikia moperisita o nneetše puku. Safane a e balela kgoši.

¹¹Ya re ge kgoši e ekwa ditaba tša puku ya melao, a gagola diaparo tša gagwe.

¹²Gomme kgoši a laela Hilikia moperisita, le Ahikama morwa wa Safane, le Akiboro morwa wa Mikaya mohlanka wa kgoši, a re:

¹³Yang le botšiše Morena ka baka laka, le ka baka la setšhaba, le ka baka la Juda ka moka. Le botšiše taba ya puku ye e hweditšwego; gobane bogale bja Morena ke bjo bogolo; bo re tuketše ka gobane botata wešo ba sa ka ba kwa se puku ye e se bolelago, ba sa ka ba dira tšohle tše re ngwaletšwego tšona.

¹⁴Hilikia moperisita, le Ahikama, le Akiboro, le Safane, le Asaya, ba ya go Huluda moporofeta wa mosadi, mogatša wa Salume morwa wa Thikwa morwa wa Harahasi moloti wa diaparo. Ge e le Huluda o be a agile motseng wa Jerusalema ka thoko e nngwe. Ba tla ba bolela le yena.

¹⁵Yena a re: Morena Modimo wa Isiraele o re: Botšang monna eo a le rometšego go nna, le re:

¹⁶Morena Modimo wa Isiraele o re: Le tsebe gore motse wo ke o tlišetša dikotsi tše di tlogo wela batho bohle ba ba agilego go wona, tšona tšeo di ngwadilwego pukung yeo e badilwego ke kgoši ya Juda.

¹⁷Ke tla di dira ka gobane ba ntahlile, ba thuntšhetša medimo e šele diorelo, ba rumola nna ka mediro ka moka ya diatla tša bona; bjale bogale bjaka bo tlo tukela motse wo, bja se ke bja tingwa.

¹⁸Ge e le kgoši ye ya Juda, e le rometšego go botšiša Morena, le e botšeng le re: Morena Modimo wa Isiraele o re:

¹⁹Ge e le wena -- ka gobane pelo ya gago e letafetše, wa ikokobetša pele ga Morena mola o ekwa tše ke boletšego motse wo le baagi ba wona ka tšona, ka re o tlo ba setšhošetši le lešapa, mme wa ntelela -- wena ke go kwile! Morena o realo.

²⁰Bjale tsebage; wena ke tlo go goroša go botatago; o tlo išwa lebitleng la gago e le šebešebe, mme mahlo a gago a ka se ke a bona dikotsi ka moka tše ke tlogo di tliša felo fa. Phetolo yeo ba e iša go kgoši.