Job 39

¹Lebaka la ge kome e tswala a o a le tseba? Le la ge tholo e šokwa?

²Dikgwedi tša ge di duša a o di badile, wa tseba letšatši la ge di tswala?

³Ge di tswala di a kudupana, tša kgotlelela ge di šokwa.

⁴Bana ba tšona ba a tia, ba golela lešokeng; ba tloga ba se hlwe ba boa.

⁵Pitsi ya naga e leswa ke mang ya itshepelela? Yona yeo thagalekwara, ke mang a e hunolotšego?

⁶Ke yona yeo ke beilego lešoka bodulo bja yona; lehanata ka re ke legae la yona.

⁷Yona e nyatša mašata a motse; ga e rate go kwa dikgalemo tša mootledi.

⁸Mafulo a yona e a nyaka dithabeng, e itsomela tše tala ka moka.

⁹Nare, a e ka rata go ba mohlanka wa gago? A e ka lala lešakeng la gago?

¹⁰Yona nare, a o ka e tlema ya latela tema? A e ka go šala nthago e phophotha makokota mohlakeng?

¹¹A o ka e bota ka ge e ne maatla a magolo, wa e gafela mediro ya gago?

¹²A o ka e holofela wa re e goroše mabele a gago, wa re e a rwale seboeng sa gago,

¹³Mpšhe e kgantšha diphego, go se lefego le le botegago, le ge e le lefofa.

¹⁴Mae a yona e a šia mo mobung; a alamelwa ke lerole.

¹⁵E lebetše gore a ka gatakelwa ka dihlako, a ka pšhatlwa ke diphoofolo.

¹⁶Bana ba yona ga e ba ekelele, eke ga se ba yona. Le ge modiro wa yona o ka senyega, ga e belaele selo.

¹⁷Gobane Modimo o e gakišitše tlhaologanyo, o e kunne temogo.

¹⁸Fela, mohla e phurolla e taboga, e nyatša pitsi le monamedi wa yona.

¹⁹A ke wene o neago pitsi maatla, wa hlama molala wa yona ka moetse?

²⁰A ke wene o e tlolatlodišago bokatšie, ge e tšhoša ka go letša dinko?

²¹E gwaila mobu ka dihlako e kgantšha maatla a yona, ge e ya go gahlana le marumo.

²²E ila poifo, ga e tšhoge selo, ga e tšhabe ge e lebana marumo,

²³ge kgotlopo e ka kgwelakgwehla dibetša e le mo go yona, ge go phadima tšhoša le lerumo.

²⁴E roromela ka sehutla, e nyatša molala; ga e sa dumela ge e kwa leparapatla.

²⁵Ge go lla kwadi ya marumo e tlo re “Agee!” E kwa monkgo wa tlhabano e le kgole; e kwa dikgalemo tša matona le mekgoši.

²⁶Nong ge e fofa, a ke ka tlhaloganyo yago? Ge e phurolla diphego mme ya leba borwa?

²⁷Ge lenong le akalala, a le romilwe ke wena? Ge le aga sehlaga sa lona makalakaleng?

²⁸Le dula mantsweng, le lala maribeng, kua dintlheng tša dithaba.

²⁹Le le gona kua le hlola dijo tša lona; mahlo a lona a bona tša kgole.

³⁰Bana ba lona ba monoka madi. Mme mo go lego setoto, le lona lenong le gona.