Job 40

¹Morena a botšiša Jobo a re:

²Motšeakgang le Yomaatlaohle a o sa re ruta? Mmega-Modimo a a fetole!

³Jobo a fetola a re:

⁴Ge e le nna, ga ke motho wa selo. Nka fetola kang? Ke swara molomo ka seatla.

⁵Ke boletše gatee, ga ke sa fetola. Ke boletše la bobedi; ga ke sa boeletša.

⁶Morena a le ledimong a fetola a re:

⁷Itleme matheka senna, ke go botšiše o nthute.

⁸A o sa re ke fošitše, wa re go šaeditše nna, wa re e a se nago molato ke wena?

⁹A o ne letsogo le le kakago la Modimo? A o ka dumiša medumo bjalo ka yena?

¹⁰Gona apara bogolo le borena, o tšhepe ka phadimo le ka letago.

¹¹Tšholla magaba, o uše tšohle tše o bonago di ikgodiša.

¹²Tšohle tše o bonago di ikgodiša o di inamiše; ba babe o ba gatakele mo ba lego gona.

¹³Bohle o ba fihle leroleng; difahlogo tša bona o di iše mo di sa hlwego di bonwa.

¹⁴Ke mo le nna ke tlogo go reta, ge tsogo la gago le go namoletše.

¹⁵O ko bone kubu, ye ke e dirilego, boka le wena ke go dirile, -- e fula bjang wa kgomo.

¹⁶O ko bone maatla a nokeng tša yona, le a ditšhika tša mpeng ya yona.

¹⁷E otlolla mosela wa etša phata ya morokwana; mme dipotongwane tša dirope tša yona di rarakane.

¹⁸Marapo a yona a etša dikota tša mphiri, dikgopo tša yona di etša mapara a tshipi.

¹⁹Ke yona ketapele ya ditsela tša Modimo; Mmopi wa yona o e file lerumo.

²⁰Dithaba di ipega go yona ka dijo; diphoofolo tša lešoka di bapala gona moo.

²¹E hutama moriting wa dihlašana; e khuta ka lehlakanoka mehlakeng,

²²Dihlare di e ukametše ka meriti; e boba mo megokareng ya noka.

²³Le ge noka e ka tlala, ga e tšhabe; le ge noka e elago e ka tšhologela leganong la yona, ga e tšhoge.

²⁴A e ka swarwa e sa bona? A e ka thulelwa mogala?

²⁵Kwena a o ka e goga ka kgwega? A o ka e tlema mohlagare ka lenti?

²⁶A o ka e tsenya mogala nkong; a o ka phula mohlagare wa yona ka letsolo.

²⁷A o re e ka ba ya go rapela, ya bolela nago ka boleta?

²⁸A o ka lakana nayo, wa e dira mohlanka wa gago ka mehla?

²⁹A o ka e bapadiša bjalo ka nonyana? A o ka e tlema wa e tliša go banenyana bago?

³⁰A e kile ya bapatšwa ke mmapatši, bareki ba segelwa nama ya yona?

³¹A o ka thulakanya tlalo la yona ka tšhoša? Hlogo ya yona a o ka e goga ka matsogo?

³²E iše letsogo, o tsebe tlhabano; o ka se ke wa boeletša.