Psalms 103

¹Moya wa ka, reta Morena! Tšohle tša teng ga ka a di rete leina lagwe le lekgethwa.

²Moya wa ka, reta Morena! O se lebale tše dibotse tše a go diretšego tšohle,

³a go lebalela melato ya gago yohle; a go fodiša malwetši a gago ka moka,

⁴a hlakodiša bophelo bjago moleteng, a go apeša botho le dikgaugelo.

⁵O go horiša tše dibotse ge o tšofala; wa bušetšwa bosogana boka nong.

⁶Modirakagoloka le molao ke Morena, ge a ahlolela ba ba hlakišwago.

⁷Ditsela tša gagwe o di tsebišitše Moshe; Baisiraele o ba tsebiša tiro tša gagwe.

⁸Morena ke mogaugedi, ke wa mabobo, ke mosefelepelo wa botho bjo bogolo.

⁹A ka se lwe ka mehla, a ka se dule a befetšwe go ya go ile.

¹⁰Se a re dirago sona ga se go latiša bokgopo, ga se go lefeletša sebe.

¹¹Ruri, botho bja gagwe bo etša legodimo, le le tletlolo ga lefase; bo tiile bo ukama ba ba mmoifago.

¹²Dikarogo tša rena o di tloša mo go rena a di iša kgole, kgole boka bohlabela bo le kgole le bodikela.

¹³Morena o šokelwa ba ba mmoifago bjalo ka tatagobana ge a gaugela bana ba gagwe.

¹⁴Gobane yena o tseba lebopo le re lego ka lona, ga a lebale ge re le lerole.

¹⁵Matšatši a motho a bjalo ka bjang; a etša letšoba la naga ge le tagile.

¹⁶Ge phefo e le feta ka godimo, le se hlwe le eba gona, mme felo ga lona go se hlwe go le tseba.

¹⁷Mme botho bja Morena bo gona bo se na mathomo le mafelo; bo ukametše ba ba mmoifago; go loka ga gagwe go gona go bana le bana ba bana;

¹⁸go lebane le ba ba dulago e le ba kgwerano yagwe, ba ba sa lebalego melao ya gagwe, ba dira ka yona.

¹⁹Morena, sedulo sa gagwe o se theile kua magodimong; mme mmušo wa gagwe o buša tše go fela.

²⁰Retang Morena, lena barongwa ba gagwe, lena bagale ba maatla ba go dira ka lentšu la gagwe, ba go theetša se a se bolelago.

²¹Retang Morena, lena madira a gagwe ohle, lena bahlanka ba gagwe ba go dira tše di mo kgahlago.

²²Retang Morena, lena dibopša tša gagwe ka moka, tše di lego mo go fela mmušong wa gagwe. Moya wa ka, reta Morena.