Psalms 104

¹Moya wa ka, reta Morena! Morena, wena Modimo wa ka, o e mogologolo, mme o apere phadimo le letago.

²O ikapeša ka seedi boka kobo; o anega legodimo bjalo ka lešela.

³Dithekgo tša hlaka ya ngwako wa gago o di tsemile madibeng. Maru o a dira dokoloi tšago; o rotoga ka diphego tša ledimo.

⁴Meoya o e dira batseta ba gago; bahlanka ba gago ke kgabo tša mollo.

⁵Lefase, metheo ya lona o e theile wa go se šišinyege neng le neng,

⁶Wa le apeša ka madiba boka seaparo; meetse a ema godimo ga dithaba.

⁷A široga o a kgalemile, a ditšhaba a tšhogile lentšu lago ge le duma.

⁸Dithaba tša botoga, melala ya patlama gona moo o e beilego gona.

⁹Wa di beela mellwane ye di ka se kego tša sela, tša boela tša ribegetša naga.

¹⁰Wa phula methopo mo melapong, ya ela gare ga dithaba.

¹¹E noša diphedi tša naga ka moka; dipitsi tša naga di tima lenyora la tšona.

¹²Ke mo go agilego nonyana tša leratadima; di kwatša melodi ya tšona di le makaleng.

¹³Dithaba o di noša meetse a a tšwago kua ngwakong wa gago wa magodimong; lefase le hora dikenyo tša ditiro tša gago.

¹⁴Dikgomo o di hlogišetša bjang, le dimela tša go fepa motho, tša go ntšha dilewa mo mobung.

¹⁵Le wona morara wa go thabiša pelo ya motho, le makhura a go tagiša sefahlego sa gagwe, le bogobe bja go tiiša pelo ya motho.

¹⁶Le dihlare tša Morena di a hora, merokwana ya dithabeng tša Libanoni ye a e šemilego.

¹⁷Mo go agilego dinonyana dihlaga tša tšona, le letlaka la re sodi ke legae.

¹⁸Gabokome ke maolo a magolo, mariba ke setšhabelo sa dipela.

¹⁹O dirile kgwedi taetšamabaka; letšatši le tseba mo le yago go dikela.

²⁰Wa dira leswiswi ya ba bošego, gwa tsoga dibata tša naga.

²¹Ditawana di a bopa, di lla dinama; di kgopela dijo go Modimo.

²²Letšatši ge le hlaba di a goma, di yo lala digoleng tša tšona.

²³Ya ba gona motho a tšwelago medirong ya gagwe la ba la dikela.

²⁴Morena, mediro ya gago ga se ka boati! O e dirile gohle ka bohlale; lefase le tletše dibopiwa tša gago.

²⁵Selele lewatle, bogolo le bonami thoko tšohle bja dinyeunya di sa balwego, diphedi tše nyenyane le tše kgolo!

²⁶Matshelawatle a sepela moo, le dibata tša madiba tše o di bopetšego go bapala moo.

²⁷Tšona tšeo tšohle di lebeletše wena gore o di nee dijo lebakeng la gona.

²⁸Ge o di nea di a topa; ge o khuporolla seatla saago di hora ka tše botse.

²⁹Ge o ka uta sefahlego sago, di ka gakanega; ge o gomiša moya wa tšona, di a hwa tša napa tša boela leroleng la tšona.

³⁰Mme ge o roma moya wa gago, di a bopega; o mpshafatša sefahlogo sa lefase ka go realo.

³¹Letago la Morena a le dule le le gona neng le leng, Morena a thabele dibopiwa tša gagwe.

³²Yena yo e rego ge lefase a le lebelela, le nape le šišinyege; e rego ge a kgwatha thaba, e nape e thunthše meuši.

³³Nna, ge ke sa phela, ke hlaba fela sa Morena; yena Modimo wa ka, ke tlo mo opelela, ge ke sa fela ke le gona.

³⁴A a kgahlwe ke sereto sa ka. Nna ke thabetše Morena.

³⁵A go fele ba go dira dibe lefaseng; ba ba sa lokago ba se ke ba ba gona. Moya wa ka, reta Morena.