Psalms 115

¹Morena, ga se la rena, ga se le rena leina, ke la gago le re rego a le retwe, gobane yo botho le yo potego ke wena.

²Ba reng ba ditšhaba ge ba re: Modimo wa bona o kae?

³Kganthe Modimo wa rena o kua magodimong, mme o dira tšohle tše di mo kgahlago.

⁴Ya bona medimo ke ya silifera le gauta, e dirwa ke diatla tša batho.

⁵E na le melomo, mme ga e bolele; e na le mahlo, mme ga e bone.

⁶E na le ditsebe, mme ga e kwe; e na le dinko, gomme ga e dupe.

⁷E na le diatla, gomme ga e sware; e na le dinao, mme ga e sepele; ga go ne lentšu le tšwago megolong ya yona.

⁸Babopi ba yona ba swana le yona, le bohle ba e botilego.

⁹Baisiraele ba bota Morena; wa go ba thuša, wa go ba kotse ya bona ke yena.

¹⁰Ba leloko la Arone ba bota Morena; wa go ba thuša, wa go ba kotse ya bona ke yena.

¹¹Ba ba boifago Morena ba mmote, yena Morena wa go ba thuša, wa go ba kotse ya bona.

¹²Morena ga a re lebale, o a šegofatša; o šegofatša ba leloko la Isiraele; o šegofatša ba leloko la Arone.

¹³O šegofatša ba ba mmoifago, ba banyenyane le ba bagolo.

¹⁴Morena o tlo le atiša, lena le bana ba lena.

¹⁵Le bašegofatšwa ba Morena e a dirilego legodimo le lefase.

¹⁶Magodimo ke magodimo a Morena; mme lefase o le neetše bana ba batho.

¹⁷Bahu bona le ba fologetšego kua go lego khomolelo, ga ba rete Morena.

¹⁸Ge e le rena, re reta Morena go tloga bjale le go ya go ile.