Psalms 59

¹Modimo wa ka, nnamolele manabeng, o mphemele ba ba ntsogetšego maatla.

²Nnamolele go badirabobe, o mphološe go banna ba madi.

³Gobane šeba, ba ntaletše; ba maatla ba rapile go mpoka, mola ke sa ka ka senya, ke sa ka ka dira sebe; Morena!

⁴Ba kganyela go itlhama mola go se ne molato. Nanoga o nkemele, o bone.

⁵Gomme wena Morena Modimo wa mašaba, wena Modimo wa Isiraele, tsoga o bone se bohle bantle ba se dirago; se lese go otla bahlanogi bao.

⁶Ba boa bošego, ba bogola bjalo ka dimpša; ba dikologa motse.

⁷Sebao, ba fufula mare ge ba bolabola, melomo ya bona e tšwa marumo, ka ge ba re: Ga go e a re kwago!

⁸Fela, wena Morena o a ba sega; bantle bohle o a ba nyatša.

⁹O maatla a ka, ke lebeletše wena, gobane sebo sa ka ke wena Modimo.

¹⁰Modimo wa ka o tlo ntlela le botho bja gagwe; ka yena Modimo ke tlo bona se manaba a ka a tlogo se dirwa.

¹¹O se ba bolaye, gore setšhaba sa ka se se ba lebale; o fo ba gašanya ka maatla a gago, o ba digele fase. Kotse ya rena ke wena Mong wa rena.

¹²Sebe sa bona ke tše ba di bolelago ka melomo. A ba itanye ka boikgodišo, le ka maroga, le ka maaka a ba a bolelago.

¹³Ba fediše ka bogale; ba fediše ba ele ruri, ba tle ba tsebe ge wena Modimo o buša fa ga Jakobo le go iša mo lefase le gomago gona.

¹⁴Gomme ba tlo boa; mantšiboa ba tlo lla bjalo ka dimpša, ba dikologa motse.

¹⁵Ba putlaputla ba nyaka dilewa; ge ba sa khore, ba lala ba nyaka.

¹⁶Mme nna ke hlaba sefela sa maatla a gago; botho bja gago ke bo hlalalela e sa le ka meso; gobane mola ke tlaletšwe o be o le sebo sa ka, setšhabelo sa ka.

¹⁷Wena maatla a ka, ke tlo go binela, gobane o Modimo sebo sa ka; o Modimo mogaugedi wa ka.