Psalms 77

¹Ke bitša Modimo; ke hlaba mokgoši; ke mo hlabošetša lentšu. O tlo ba a nkwa.

²Ke mohla wa tlalelo; ke nyaka wena Mong a ka; ke lala ke emiša diatla tša ka ke sa lape; pelo ya ka ga e homotšege.

³Ke gopola Modimo ke fegelwa, ke akanya pelo ya ka e dumala.

⁴Dintšhi tša mahlo a ka di swerwe ke wena, ke hlobogile, ga ke sa kgona go bolela.

⁵Ke gopola tša mehla ya kgale, tša nywaga ya bogologolo.

⁶Ke lala ke gopola tša mola ke bina dikoša; ke re ke fepeletše pelo ya ka; mme moya wa ka o nyaka tsela,

⁷A Morena o hladile ya ba mokamoka? A a ka se ke a hlwa a gaugela?

⁸A botho bja gagwe bo feletše ruri? Kholofedišo a e senyegetše ditlogolo le ditlogolwana?

⁹A Modimo o gakilwe ke go gaugela? A o kgonyeletše tlhomogelo ya gagwe ka sekgoro?

¹⁰Mme nna ke re: Ke bjona bohloko bja ka bjo: Letsogo le letona la Yogodimodimo le phekgogile.

¹¹Ke gopola ditiro tša Morena. Ruri, ke gopola mehlolo yago ya bogologolo.

¹²Ke elelwa ditiro tša gago ka moka; ke akanya tše wena o di dirilego.

¹³Modimo, tsela ya gago e ya ka tše kgethwa; o kae modimo e a kago lekana le wena Modimo?

¹⁴O Modimo modiramehlolo; maatla a gago o a bonaditše ditšhabeng.

¹⁵Sa gago setšhaba o se namoletše ka letsogo la gago, bona bana ba Jakobo ba, le ba Josefa.

¹⁶Meetse a go bone, wena Modimo. Meetse a go bone a tšhoga, le madiba a huduega.

¹⁷Maru a tšholla meetse, maru a duma, gwa betšwa mesebe ya gago.

¹⁸Lentšu la gago la medumo la na la dikologa, dikgadima tša fafanyega gohle; lefase la roromela la šišinyega.

¹⁹Tsela ya gago ya phatša lewatle, mmila wa gago wa tšwa ka gare ga madiba a magolo; mme gwa se ke gwa tsebja lwao la gago.

²⁰Setšhaba sa gago wa se sepediša bjalo ka mohlape ka Moshe le ka Arone.