Psalms 93

¹Yehovha i hosi, u ambale swiambalo swo saseka; Yehovha u ambale matimba lawa a tibohiseke ha wona; kutani misava yi tiyile, lerova a yi nge tshukatshuki.

²Xiluvelo xa wena xi tiyile ku sukela khale, u tshame u va kona ku sukela khale.

³Swinambyana swi tlakukile, Yehovha, swinambyana swi tlakukile marito ya swona; tindhambhi ti tlakusa magandlati ya tona.

⁴Yehovha la nga ehenhla u ni matimba ku tlula mpfumawulo wa mati yo tala, ina, ku tlula magandlati lamakulu ya lwandle.

⁵Switsundzuxo swa wena swa tiyiseka swinene: Yindlu ya wena yi kwetsima, Yehovha, hilaha ku nga heriki.