1 Kings 12

¹Rehoboame a ya Shekeme, gonne Baiseraele botlhe ba ne ba tsile Shekeme go mo dira kgosi.

²Ga dirala, ya re Jeroboame morwa Nebate a go utlwela; gonne o ne a sa ntse a le kwa Egepeto, kwa o ne a tshabetse gone a tswa mo ponong ya kgosi Solomone, mme Jeroboame a bo a agile mo Egepeto.

³Ba roma ba ya go mmitsa; Jeroboame le ba phuthego yotlhe ya Iseraele ba tla, ba bua le Rehoboame ba re:

⁴“Rraago o ne a re tlhokofaletsa jokwe ya rona; mme jaana ra re, tirelo e e botlhoko ya ga rraago, le jokwe ya gagwe e e bokete, o tle o e tlhofofatse, mme re tlaa go direla.”

⁵A ba raya a re: “Namang lo sa ntse lo tsamaile ka malatsi a le mararo, foo lo tle kwano go nna gape.” Mme batho ba tsamaya.

⁶Kgosi Rehoboame a gakololana le bannabagolo, ba ba neng ba eme fa pele ga Solomone rraagwe a sa ntse a tshela a re: “Lo nnaya kgakololo efe, gore ke tle ke neye batho ba phetolo?”

⁷Ba bua nae, ba re: “Fa o ka ineela go nna motlhanka wa batho ba ka tsatsi leno, wa ba direla, wa ba fetola o bua mafoko a a molemo nabo, foo ba tlaa nna batlhanka ba gago ka bosakhutleng.”

⁸Mme a latlha kgakololo ya bannabagolo e ba e mo neileng, a gakololana le makau a a goletseng gongwe nae, a a emeng fa pele ga gagwe.

⁹A ba raya a re: “Lona lo nnaya kgakololo efe, gore re tle re busetse batho ba ba buileng le nna phetolo, jaaka ba re: ‘Tlhofofatsa jokwe e rraago o ne a e baya mo go rona?’ ”

¹⁰Makau a a goletseng gongwe nae a bua nae a re: “Batho ba ba buileng nao ba re: ‘Rraago o ne a ketefatsa jokwe ya rona, mme wena o e re tlhofofaletse;’ o tle o bue nabo jaana, o re: ‘Monwana wa me o monnye, o feta lotheka lwa ga rre ka bokima.

¹¹E re ka rre a ne a lo baya jokwe e e bokete, nna ke tlaa oketsa jokwe ya lona; rre o ne a lo simega ka dime, mme nna ke tlaa lo simega ka diphepheng.’ ”

¹²Jeroboame le batho botlhe ba tla kwa go Rehoboame ka letsatsi la boraro, jaaka kgosi e laotse ya re: “Lo tle kwano go nna gape ka letsatsi la boraro.”

¹³Kgosi ya fetola batho ka kgobololo, a latlha kgakololo ya bannabagolo e ba ne ba e mo neile;

¹⁴a bua ka fa kgakololong ya makau a re: “Rre o ne a ketefatsa jokwe ya lona, nna ke tlaa oketsa jokwe ya lona; rre o ne a lo simega ka dime, mme nna ke tlaa lo simega ka diphepheng.”

¹⁵Jalo kgosi e se ka ya reetsa batho; gonne e ne e le selo se se dirilweng ke Jehofa, gore a tlhomamise lefoko la gagwe, le Jehofa o ne a le buile le Jeroboame, morwa Nebate, ka Ahija wa Mošilone.

¹⁶E rile Baiseraele botlhe ba bona fa kgosi e sa ba reetsa, batho ba fetola kgosi ba re: “Ana re na le kabelo efe mo go Dafite? Le gone ga re na boswa bope mo go morwa Jese; Baiseraele, yang megopeng ya lona; wena Dafite o bone e e leng kgotla ya gago.” Baiseraele ba tloga ba ya megopeng ya bone.

¹⁷Ka ga bana ba Iseraele ba ba agileng mo metseng ya Juta, bone, Rehoboame a ba busa fela.

¹⁸Foo kgosi Rehoboame a roma Atorame yo o laolang lekgetho; mme Baiseraele botlhe ba mo kgobotletsa ka maje, a swa. Kgosi Rehoboame a itlhaganela a ya a palama mo kareng ya gagwe a tshabela kwa Jerusalema.

¹⁹Baiseraele ba sa le ba tsuololela kgotla ya ga Dafite nako e sa le eno.

²⁰Ga dirala, e rile Baiseraele botlhe ba utlwa fa Jeroboame a boile, ba roma ba mmiletsa pitsong, ba mo dira kgosi ya Baiseraele botlhe; go ne go se na ope yo o salang kgotla ya ga Dafite morago, fa e se lotso lwa Juta lo le losi fela.

²¹E rile Rehoboame a tla Jerusalema, a phutha botlhe ba kgotla ya Juta le lotso lwa ga Benjamine, banna ba ba tlhophilweng ba le 180 000, ba e ne e le batlhabani gore ba ye go tlhabana le ba kgotla ya Iseraele, ba be ba busetse bogosi mo go Rehoboame morwa Solomone.

²²Mme lefoko la Modimo la tla kwa go Shemaia, motho wa Modimo, la re:

²³“Bua le Rehoboame morwa Solomone, kgosi ya Juta, le ba kgotla botlhe ba Juta le Benjamine, le batho ba bangwe, o re:

²⁴‘Jehofa o bua jaana, a re: Lo se ka lwa bolola, le fa e le go tlhabana le bana ba ga rraeno, bana ba Iseraele; a mongwe le mongwe a boele ntlong ya gagwe, gonne selo se, se tswa mo go nna.’ ” Mme ba reetsa lefoko la ga Jehofa, ba boa, ba ikela tseleng tsa bone, ka fa lefokong la ga Jehofa.

²⁵Foo Jeroboame a aga motse wa Shekeme mo lefatsheng la Eferaime la makgabana, a aga gone; a tswa gone, a ya a aga motse wa Penuele.

²⁶Jeroboame a ithaya mo pelong ya gagwe, a re: “Jaana bogosi bo tlaa boela kwa kgotleng ya ga Dafite.

²⁷Fa batho ba, ba ya go isa ditlhabelo mo ntlong ya ga Jehofa kwa Jerusalema, foo pelo ya batho ba e tlaa ba e boela moreneng wa bone, e bong mo go Rehoboame kgosi ya Juta; mme ba tlaa mpolaya, ba boela kwa go Rehoboame kgosi ya Juta.”

²⁸Foo kgosi ya batla kgakololo, mme a dira dinamane di le pedi tsa gouta; a raya batho a re: “Go ya kwa Jerusalema go thata bobe; Iseraele, bona medimo ya gago e go ntshitseng kwa lefatsheng la Egepeto.”

²⁹Namane nngwe a e baya mo Bethele, e nngwe a e baya mo Dane.

³⁰Selo se sa nna boleo; gonne batho ba ne ba tle ba ye go obamela e nngwe, e bong fela kwa Dane.

³¹A dira matlo a mafelo a a tlotlometseng, a ba a dira baperesiti ba ba tsholwang mo bathong botlhe fela, ba e seng ba bomorwa Lefi.

³²Jeroboame a laolela kgwedi ya bofera mebedi modiro ka letsatsi la 15 la kgwedi, ya nna o o tshwanang le modiro o o kwa Juta, ene a ya sebesong; a dira jalo kwa Bethele a isetsa dinamane tse o di dirileng ditlhabelo. A baya mo Bethele baperesiti ba mafelo a a tlotlometseng a o a dirileng.

³³Ene a ya sebesong se o se dirileng kwa Bethele ka letsatsi la 15 la kgwedi ya 8, e bong ka yone kgwedi e o e ikgakolotseng ka pelo ya gagwe; a laolela bana ba Iseraele modiro, mme a ya sebesong, a ya go fisa maswalo.