1 Kings 13

¹Bonang ga tla motho wa Modimo mo Bethele, a tswa kwa Juta, a tla ka lefoko la ga Jehofa; Jeroboame a bo a eme fa sebesong, a re a fisa maswalo.

²Mme a kua ka lefoko la ga Jehofa ka ga sebeso, a re: “Sebeso we! Sebeso we! Jehofa o bua jaana, a re: ‘Bona, kgotla ya ga Dafite e tlaa tsalelwa ngwana, leina la gagwe Josia; o tlaa bolaela mo godimo ga gago baperesiti ba mafelo a a tlotlometseng ba ba fisang maswalo mo godimo ga gago, mme ba tlaa fisa marapo a batho mo godimo ga gago.’ ”

³A ba kaela sesupo ka tsatsi leo, a re: “Ke sone sesupa se Jehofa o se boletseng, a re: ‘Bona, sebeso se tlaa phatloga, le melora e e mo go sone e tlaa tshologa.’ ”

⁴Ga dirala ya re kgosi e utlwa polelo ya motho wa Modimo, e o kuileng ka yone ka ga sebeso mo Bethele, Jeroboame a ntsha letsogo, a le fa sebesong, a re: “Mo tshwareng!” Mme letsogo la gagwe le o le mo ntsheditseng la omelela, a ba a retelelwa ke go ba a le gona.

⁵Sebeso le sone sa phatloga, le melora ya tshologa mo sebesong, ka fa sesupong se motho wa Modimo o ne a se kaile ka lefoko la ga Jehofa.

⁶Kgosi ya bua ya raya motho wa Modimo ya re: “A ko o nkokotlelele thuso ya ga Jehofa Modimo wa gago, o nthapelele, gore letsogo la me le mpholele.” Mme motho wa Modimo a kokotlela Jehofa, mme letsogo la kgosi la e folela, la nna jaaka le ne le ntse pele.

⁷Kgosi ya raya motho wa Modimo ya re: “Ya le nna kwa gae, o tle o itapolose, ke tlaa go naya tuelo.”

⁸Mme motho wa Modimo a raya kgosi a re: “Le fa o ka nnaya bontlhanngwe jwa ntlo ya gago, ga nketla ke tsena nao, le gone ga nketla ke ja dijo le fa e le go nwa metsi mo felong fano;

⁹gonne ke laetswe jalo ke lefoko la ga Jehofa la re: ‘O se ka wa ja dijo dipe, le fa e le go nwa metsi, le fa e le go ba o bowa ka tsela e o tsamaileng ka yone.’ ”

¹⁰Mme a tsamaya ka tsela e sele, a se ka a bowa ka tsela e o ne a tsile ka yone mo Bethele.

¹¹Jaana go ne go agile moperofeti mongwe wa monnamogolo mo Bethele; mme mongwe wa bomorwawe a tla a mmolelela ditiro tsotlhe tse motho wa Modimo o di dirileng ka letsatsi leo mo Bethele, mafoko a o a buileng le kgosi le one ba a bolelela rraabo.

¹²Rraabo a ba raya a re: “O tsamaile ka tsela efe?” Bomorwawe ba bo ba bonye tsela e monna wa Modimo o ne a tsamaya ka yone, ene yo o ne a tswa kwa Juta.

¹³A raya bomorwawe a re: “Mpelesetsang esela.” Jalo ba mmelesetsa esela. A e palama.

¹⁴A latela motho wa Modimo, a mo fitlhela a dutse fa tlase ga mooka mongwe, a mo raya a re: “A ke wena motho wa Modimo yo o tswang Juta?” Mme a re: “Ke nna.”

¹⁵Foo a mo raya a re: “Ya le nna kwa gaetsho, o tle go ja dijo.”

¹⁶Mme a re: “Ga ke na go boa nao, le fa e le go tsena nao, le gone ga nketla ke ja dijo, le fa e le go nwa metsi nao mo felong fano,

¹⁷gonne ke reilwe ke lefoko la ga Jehofa la re: ‘O se ka wa ja dijo dipe, le fa e le go nwa metsi gone, le fa e le go boa ka tsela e o ne wa tsamaya ka yone.’ ”

¹⁸A mo raya a re: “Le nna ke moperofeti jaaka wena; mme moengele mongwe o buile le nna ka lefoko la ga Jehofa a re: ‘Ya o mmusetse kwa ntlong ya gago, gore a tle go ja dijo le go nwa metsi;’ ” mme a bo a mo aketsa fela.

¹⁹Mme a boa nae, a ja dijo mo ntlong ya gagwe, a nwa metsi.

²⁰Ga dirala ya re ba dutse fa lomating, lefoko la ga Jehofa la tla mo moperofeting yo o mmusitseng.

²¹A goelela motho wa Modimo yo o tswang Juta a re: “Jehofa o bua jaana, a re: ‘E re ka o ganne go utlwa molomo wa ga Jehofa, wa ba wa se ka wa tshegetsa taolo e Jehofa Modimo wa gago o e go laoletseng,

²²mme wa boa, o jele dijo, o nole metsi mo felong fa o go reileng ka ga gone a re: O se ka wa ja dijo dipe, le fa e le go nwa metsi ape gone; setoto sa gago ga se ketla se fitlha mo phupung ya borraago.’ ”

²³Ga dirala ya re a sena go ja dijo, le a sena go nwa, a mmelesetsa esela, ke go re, a belesetsa moperofeti yo o ne a mmusitse.

²⁴Ya re a sena go tsamaya, tau ya rakana nae mo tseleng, ya mmolaya; setoto sa gagwe sa namalala mo tseleng, mme esela ya ema fa go sone, tau le yone ya ema fa setotong.

²⁵Mme bonang, batho ba feta ba bona setoto se namaletse mo tseleng, le tau e eme fa setotong; mme ba fitlha ba bolela mo motseng kwa moperofeti wa monnamogolo o agileng gone.

²⁶E rile moperofeti yo o ne a mmusa mo tseleng a utlwa, a re: “Ke motho wa Modimo, yo o ne a gana go utlwa molomo wa ga Jehofa; ke gone ka moo Jehofa o mo neetseng tau e e mo gagotseng, ya mmolaya, ka fa lefokong la ga Jehofa, le o ne a le bua nae.”

²⁷A bua le bomorwawe a re: “Mpelesetsang esela.” Ba e belesa.

²⁸A ya a fitlhela setoto sa gagwe se namaletse fela mo tseleng, le esela le tau di eme fa setotong: tau e ise e je setoto, le fa e le go gagola esela.

²⁹Moperofeti a tsaya setoto sa motho wa Modimo, a se baya mo eseleng, a boa naso; a tla mo motseng wa moperofeti wa monnamogolo, a tla go lela, le go mo filtha.

³⁰A baya setoto sa gagwe mo phupung ya gagwe; mme ba mo lelela, ba re: “Ijoo! A ngwana wa ga rre!”

³¹Ga dirala ya re a sena go mo fitlha, a bua le bomorwawe, a re: “E tlaa re ke sena go swa, foo lo mphitlhe mo phupung e motho wa Modimo o fitlhilweng mo go yone, lo beye marapo a me fa marapong a gagwe.

³²Gonne polelo e o e boletseng ka lefoko la ga Jehofa ka ga sebeso se se mo Bethele le ka ga matlo otlhe a mafelo a a tlotlometseng, a a mo metseng ya Samaria, ruri e tlaa dirala.”

³³Morago ga selo se Jeroboame ga a ka a boa mo tseleng ya gagwe e e bosula, mme a ba a dira gape baperesiti ba mafelo a a tlotlometseng ba ba tsewang mo bathong botlhe fela; yo o ratang fela a mo tshwae, gore ba tle go nna baperesiti ba mafelo a a tlotlometseng.

³⁴Selo se sa nna boleo mo ntlong ya ga Jeroboame, sa ba sa e kgaola, sa e senya ya nyelela mo lefatsheng.