Job 19

¹Foo Jobe a fetola a re:

²“Lo tlaa nna lo tshwenya mowa wa me, lo nthubaganya ka mafoko ka lobaka lo lo kae?

³Jaanong lo nkgobile ga some; ga lo tlhajwe ke ditlhong fa lo ntirela ka bopeloethata.

⁴Fa go ntse jalo, e re fa ke timetse, timelo ya me e be e setse e na le nna ka nosi.

⁵Fa ruri lo rata go inkgodiseletsa, le go nkgagamaletsa sekgobo sa me,

⁶itseng jaanong fa Modimo o nthibegeditse mo mafokong a me, mme o ntsentse gare ka lotloa lwa one.

⁷Bonang, ke lela ke le mo patikegong, mme ga ke utluwe; ke lelela thuso, mme ga go na tshiamiso.

⁸O thibile tsela ya me ka logora, ga ke na ka fa ke ka fetang ka gone, o beile lefifi mo ditselaneng tsa me.

⁹O nkapotse kgalalelo ya me, o nthotse serwalo mo tlhogong.

¹⁰O nthutlolotse ka ntlha tsotlhe, mme ke ile; tsholofelo ya me o e khumotse jaaka setlhare.

¹¹O bile o ntukiseditse bogale jwa one, o nkaya go re ke mongwe wa baganetsi ba one.

¹²Mephato ya one e tla e le mmogo, e nkoeletsa tsela ya yone, e thibelela tikologong ya mogope wa me.

¹³“O ntomologanyeditse kgakala le bana ba ga rre, ba ke itsanyeng nabo ba nnkgeletse ruri.

¹⁴Ba losika lwa me ba tlhaetse, le ditsala tsa me tse ke tlwaelanyeng natso di ntebetse.

¹⁵Ba ke agileng nabo mo ntlong, le malata a me, ba nkaya go re ke moeng fela; ke motho o sele fela mo ponong ya bone.

¹⁶Ke bitse motlhanka wa me, a se ke a nkarabe, le fa ke mo rapela ka molomo wa me.

¹⁷Mowa wa legano la me o nkgetse mosadi wa me, le mokokotlelo wa me o nkgetse bana ba sebopelo sa ga mme.

¹⁸Le ba e leng banyana ba bannye ba nnyatsa; fa ke nanoga, ba bue ba ntshotle.

¹⁹Ditsala tsotlhe tsa me tsa mmaanete ke di ferosa sebete fela, le baratwa ba me ba mphetogetse.

²⁰Lesapo la me le ngaparetse letlalo le nama ya me, ke falotse ka nama ya marinini fela.

²¹Ntlhomogelang pelo! ntlhomogelang pelo! ditsala tsa me we; gonne seatla sa Modimo se nkamile.

²²Ana lo mpogisetsang jaaka Modimo, lo sa kgora nama ya me?

²³“A bo mafoko a me a ka bo a kwadilwe jaana! A ka bo ne ne a ralegilwe mo lokwalong!

²⁴A bo a ka bo a setilwe ka segabo sa tshipi le ka lotwe mo lefikeng ka bosakhutleng!

²⁵Nna ke a itse fa morekolodi wa me a tshedile, le go re o tlaa re kwa bofelong a eme ka dinao mo lefatsheng.

²⁶E tlaa re morago letlalo la me le sena go senngwa jaana, ke tlaa bona Modimo ke le mo nameng ya me;

²⁷o ke tlaa o iponelang ka nosi, matlho a me a tlaa o leba, e seng a o sele. Diphilo tsa me di fediwa mo teng ga me.

²⁸Fa lo ithaya lo re: ‘A bo re tlaa mmogisa!’ E re ka modi wa mmaanete o fitlhetswe mo go nna;

²⁹lo boife tšhaka, gonne bogale jo bo botšarara bo lere dipetso tsa tšhaka, gore lo tle lo itse fa go na le tshiamiso.”