Job 20

¹Foo ga fetola Sofare wa Monaamatha a re:

²“Ke gone ka moo megopolo ya me e nnayang phetolo, e bong ka ntlha ya go potlaka ga me mo go nna.

³Ke utlwile kgalemelo e e ntlhabisang ditlhong, mowa wa tlhaloganyo ya me wa mphetola.

⁴A gale, bogologolo, e sa le ka motho a bewa mo lefatsheng, a o ntse o sa itse se,

⁵sa go re, go ja koma ga baikepi go le go khutshwane, le boitumelo jwa ba ba sa reng Modimo sepe bo nna ka ponyo ya leitlho fela?

⁶Le fa tlotlomalo ya gagwe e palamela kwa magodimong, le tlhogo ya gagwe e fitlha kwa marung;

⁷le fa go ntse jalo o tlaa felela ruri ka bosakhutleng jaaka maswe a gagwe; ba ba mmonyeng ba tlaa re: ‘O kae?’

⁸O tlaa fofela koo fela jaaka toro, mme ga a ketla a fitlhelwa; ee, o tlaa alolwa jaaka ponatshegelo ya bosigo.

⁹Leitlho le le kileng la mmona ga le ketla le tlhola le mmona gope; le gone felo ga gagwe ga go ketla go tlhola go mo leba.

¹⁰Bana ba gagwe ba tlaa batla botsalano jwa bahumanegi, diatla tsa gagwe di tlaa rebola khumo ya gagwe.

¹¹Le fa marapo a gagwe a tletse bokolwane, bo tlaa itelega nae mo loroleng.

¹²le fa boikepo bo le botshe mo ganong la gagwe, le fa a bo suba fa tlase ga loleme lwa gagwe;

¹³le fa a bo rekegela, a gana go bo lesa, mme a ntse a bo tshegeditse fela mo teng ga legano la gagwe;

¹⁴le fa go ntse jalo, dijo tsa gagwe di fetogile mo maleng a gagwe, ke botlhoko jwa dinenebu mo teng ga gagwe.

¹⁵O komeditse dikhumo, mme o tlaa ba a di tlhatsa; Modimo o tlaa di gelola mo mpeng ya gagwe.

¹⁶O tlaa mona botlhoko jwa dinenebu; lolema lwa šaušawane lo tlaa mmolaya.

¹⁷Ga a ketla a leba dinoka, dinokana tse di elang dinotshe le madila a maši.

¹⁸Se o ne a se itapisetsa o tlaa se busa, mme ga a ketla a se meletsa mo teng; ga a ketla a itumelela thoto e o e bapetseng.

¹⁹Gonne o patikile a latlha bahumanegi; o gapile ntlo ka thata, e o ne a se ka a e aga.

²⁰“E re ka a ne a sa itse boiketlo mo teng ga gagwe, ga a ketla a sala le sepe sa se o ne a itumela mo go sone.

²¹Ga se ka ga sala sepe se o sa se jelang ruri; ke gone ka moo go tlhogonolofala ga gagwe ga go ketla go tlhomama.

²²O tlaa re mo botlalong jwa letlotlo la gagwe a nne mo pitlaganong; seatla sa mongwe le mongwe yo o mo matladikeng se tlaa wela mo go ene.

²³E tlaa re mogang o reng o kgora mo mpeng, Modimo o latlhele bogale jwa tšarologo ya one mo go ene, o tlaa bo kgoromeletsa mo go ene a sa ntse a ja.

²⁴O tlaa tshaba sebolao sa tshipi, bora jwa kgotlho bo tlaa mo phololetsa.

²⁵Fa mongwe a o somola, o tswe mo mmeleng wa gagwe; ee, segale se se phatsimang se tswe mo santlhokweng wa gagwe; ditheregiso di mo go ene.

²⁶Lefifi lotlhe le beetswe dikhumo tsa gagwe tse di rategang; molelo o o sa butswelwang ke motho o tlaa mo laila; o tlaa nyeletsa se se setseng mo mogopeng wa gagwe.

²⁷Magodimo a tlaa senola boikepo jwa gagwe, le lefatshe le tlaa mo tsogologela.

²⁸Totafalo ya ntlo ya gagwe e tlaa tloga, dithoto tsa gagwe di tlaa elela koo mo tsatsing la botšarara jwa one.

²⁹Kabelo ya moikepi ke eo, e tswa mo Modimong, le boswa jo o bo laoletsweng ke Modimo.”