Job 21

¹Foo Jobe a fetola a re:

²“Lo bo lo utlweng puo ya me sentle; mme se e nne dikgomotso tsa lona.

³Ntesang, le nna ke tlaa bua; ke tlaa re ke sena go bua, lo sotlele pele fela.

⁴Ka ga me, go itoka ga me a ke go itokela motho? Ke tlaa bo ke sa nne legweegwee ka ntlha yang?

⁵Lo nkele tlhoko, lo gakgamale, mme lo ipeye seatla mo melomong.

⁶Ee, le e tle e re fa ke gakologelwa ke huduege, le go tsitla marapo go ntshware.

⁷Ana baikepi ba tshela ka ntlha yang ba tsofale, ee, ba natlafale mo nonofong?

⁸Losika lwa bone lo tlhomame nabo mo ponong ya bone, le lotsalo lwa bone mo matlhong a bone.

⁹Mantlo a bone a dibelesege mo poifong, le gone thupa ya Modimo ga e ke e nna mo go bone.

¹⁰Poo ya bone e gwele fela e se ke e tlhaele; kgomo ya bone e tsale e se ke e folotse.

¹¹Ba tle ba bolotse banyana ba bone jaaka letsomane, mme bana ba bone ba bine.

¹²Ba opelele meropana le harepe, ba itumelele go lediwa ga lotlhaka.

¹³Ba fetise malatsi a bone mo tlhogonolofalong, mme e a re ka ponyo ya leitlho ba kotlomelele fela mo Bobipong.

¹⁴Le fa go ntse jalo, ba reile Modimo ba re: ‘Tloga mo go rona; gonne ga re eletse kitso ya ditsela tsa gago.

¹⁵Mothatayotlhe ya bo e le eng, fa e bo ne ne re ka mo direla? Re tlaa bo re bona molemo wang fa re mo rapela?’

¹⁶Bona, go tlhogonolofala ga bone ga go mo seatleng sa bone; kgakololo ya baikepi ke kgakala nayo.

¹⁷Lobone lwa baikepi lo tle lo tingwe ga kae? Tatlhego ya bone e tle e ba tlele ga kae? Modimo o tle o abe mahutsana mo bogaleng jwa one ga kae?

¹⁸Fa ba tla bo ba ka nna ga kae jaaka dirine fa pele ga phefo, le jaaka mmoko o setsuatsue se o tsubulang?

¹⁹Lo a tle lo re: ‘Modimo o beela bana ba gagwe boikepo jwa gagwe.’ A o bo lefetse mo go ene ka esi gore a bo ikitse.

²⁰A matlho a gagwe ka osi a bone tshenyego ya gagwe, a a nwe botšarara jwa Mothatayotlhe.

²¹Gonne o na le go kgatlhwa ke eng mo ntlong ya gagwe morago ga gagwe, etswa palo ya dikgwedi tsa gagwe e kgaotswe ka bogare?

²²A mongwe o ka ruta Modimo kitso, etswa o atlhola bogoletsegi?

²³Mongwe o swa a tletse nonofo a iketlile, a ituletse gotlhe fela.

²⁴Mabele a gagwe a tletse maši, le moko wa marapo a gagwe o mahura fela.

²⁵Yo mongwe a swe a le mowa o botlhoko, le a e se ke a utlwe se se molemo gope.

²⁶Ba itelege mmogo fela ka bobedi mo loroleng, mme seboko se ba khurumetse.

²⁷“Bonang, ke a e itse megopolo ya lona, le maano a lo a ntogelang ka go sa siamang.

²⁸Gonne lwa re: ‘Ntlo ya kgosana e kae? Le mogope o moikepi o kileng a o nna o kae?’

²⁹A ga lo a botsa bone ba ba fetang le tsela? A ga lo itse dikao tsa bone?

³⁰Go re motho yo o bosula o rekegelelwa letsatsi la tatlhego, le go re ba gogelwa koo kwa letsatsing la botšarara?

³¹E mang yo o tlaa bolelang tsela ya gagwe matlhong a gagwe? E mang yo o tlaa mo kgopololelang se o se dirileng?

³²Le fa go ntse jalo o tlaa isiwa kwa lebitleng, mme ba tlaa lebela phupu ya gagwe.

³³Makote a molapo a tlaa nna botshe mo go ene, mme batho botlhe ba tlaa gogegela kwa go ene, jaaka go ne go le ba ba se nang palo pele ga gagwe.

³⁴Mme e le foo lo nkgomotsa jang ka lefela, ka mo diphetolong tsa lona go setse boikanyologo fela.”