Job 29

¹Mme Jobe a fela a tlhaba seane sa gagwe, a re:

²“A bo ke ka bo ke ntse jaaka mo dikgweding tsa bogologolo, jaaka mo malatsing a Modimo o ntisitseng ka one;

³ka lampa ya one wa mphatsimela mo tlhogong, mme ka tsamaya ka lesedi la one;

⁴jaaka ke ne ke le mo nonofong ya malatsi a me, jaaka ka tsalano ya Modimo e le mo mogopeng wa me;

⁵ka Mothatayotlhe a sa ntse a na le nna, le bana ba me ba le tikologong ya me;

⁶ka dikgato tsa me di ne di tlhapisiwa ka madila a maši, mme lefika la nthelela dinoka tsa lookwane!

⁷E ne e tle e re ke tswela kwa kgotleng kwa motseng, e re ke baakanya setulo sa me mo mmileng,

⁸makau a ne a tle a re a mpona a iphitlhe, le banna bagolo ba nanoge ba eme ka dinao;

⁹dikgosana di khutle go bua, di ipeye seatla mo molomong;

¹⁰lentswe la bagolwane le tuulale, le loleme lwa bone lo ngaparele magalapa a bone.

¹¹Gonne e ne e tle e re tsebe e nkutlwa, foo e ntshegofatse; e re leitlho le mpona, le supe ga me;

¹²gonne ke ne ke pholosa mohumanegi yo o goelelang, le lesiela le le se nang ope yo o le thusang.

¹³Tshegofatso ya yo o batlileng go nyelela ya tla mo go nna; pelo ya mosadi wa motlholagadi ka e ipedisa ka boitumelo.

¹⁴Ka apara tshiamo, mme ya nkapesa; tekatekanyo ya me e ne e ntse jaaka kobo le tlhoro ya bogosi.

¹⁵Ke ne ke le matlho a difofu, ke le dinao tsa batlhotsi.

¹⁶Ke ne ke le rra batlhoki; ka ba ka tlhotlhomisa mafoko a tsheko a yo ke sa mo itseng.

¹⁷Ka roba ditlhaya tsa mosiamolodi, ka phamola thopo mo menong a gagwe.

¹⁸Foo ka re ke tlaa swela mo setlhageng sa me, ke tlaa ntsifatsa malatsi a me a nna jaaka mošawa.

¹⁹Modi wa me o anametse kwa metsing, monyo o lala o le mo kaleng ya me bosigo jotlhe.

²⁰Borena jwa me bo ntse boša mo go nna, bora jwa me bo šafetse mo seatleng sa me.

²¹Batho ba ne ba tle ba ntshekegele tsebe, ba lebelele, ba didimalele kgakololo ya me.

²²E re morago ga mafoko a me ba se ke ba tlhole ba bua; mme puo ya me ya ba rothela.

²³Ba ne ba ntebelela jaaka go lebelelwa pula; ba atlhamolosa legano thata jaaka ekete go na pula ya kgogolammoko.

²⁴Fa ke ne ke ba tshega ba se ke ba go dumele; le go sa ga matlho a me ba se ke ba go tlhontshe.

²⁵Ka ba senkela tsela ya bone, mme ka nna tlhogo, ka ba ka aga jaaka kgosi mo ntweng, jaaka mongwe yo o gomotsang bahutsafadi.”