Job 33

¹“Le fa go ntse jalo wena Jobe, ke a go rapela, utlwa puo ya me, o reetse mafoko a me otlhe.

²Bona jaana, ke tumolotse molomo wa me, loleme lwa me lo buile mo ganong la me.

³Mantswe a me a tlaa kakanya thokgamo ya pelo ya me; se dipounama tsa me di se itseng di tlaa se bua ka bophepa.

⁴Mowa wa Modimo o ntirile, go budula ga Mothatayotlhe go a ntshedisa.

⁵Fa o nonofile, o tle o mphetole; o rulaganye mafoko a gago; ema fa pele ga me!

⁶Bona, nna ke ntlheng ya Modimo, fela jaaka wena; le nna ke bopilwe ka letsopa.

⁷Bona, theregiso ya me ga e ketla e go boifisa, le gone ga o ketla o imelesega ka kgatelelo ya me.

⁸“Ruri o buile mo kutlong ya me, ke utlwile lentswe la mafoko a gago, wa re:

⁹‘Ke itshekile, ke se na tlolo; ke phepa fela, le gone ga go na boikepo mo go nna.

¹⁰Bona, o bona dikgopi mo go nna, o nkaya go re ke mmaba wa one;

¹¹o tsenya dinao tsa me mo disaneng, o tlhokometse ditselana tsotlhe tsa me.’

¹²Bona, ke tlaa go fetola mo go se, ga o a siama; gonne Modimo o mogolo bogolo go motho.

¹³Ana o ganelelang le one, gonne ga o ke o ipolelela mo dilong dipe tsa one?

¹⁴Gonne Modimo o bua gangwe fela, ee gabedi, le fa motho a sa go tlhokomele.

¹⁵E re mo torong, mo ponatshegelong ya bosigo, fa thulamelo e kgolo e wela batho mo borokong mo bolaong;

¹⁶foo o kabolole batho ditsebe, o kanele thuto mo go tsone.

¹⁷Gore o tlose motho mo boikaelelong jwa gagwe, le go subela motho boikgodiso;

¹⁸o thiba mowa wa gagwe, gore o se ye mo moleteng, le botshelo jwa gagwe gore a se swe ka tšhaka.

¹⁹Le gone o otlhaiwa ka bolwetse mo bolaong jwa gagwe, le ka tlhatlharo e e sa khutleng mo marapong a gagwe;

²⁰jalo botshelo jwa gagwe boo bo tle bo tenwe ke dijo, le mowa wa gagwe ke dijo tse di metsegang.

²¹Nama ya gagwe e tlhorege, ga e kake ya bonwa; marapo a gagwe a a neng a sa bonwe a bile a tswetse kwa ntle.

²²Ee, mowa wa gagwe o atamela kwa moleteng, le botshelo jwa gagwe kwa disenying.

²³Fa go na le moengele mongwe nae, e le mophutholodi, e le motho a le mongwe fela mo go ba ba sekete, gore a kaele motho se se mo siametseng;

²⁴foo o nna pelotshweu kwa go ene, mme o re: ‘Mo golole, gore a se ka a fologela mo moleteng, ke bonye thekololo.’

²⁵Nama ya gagwe e tlaa šafala bogolo go ya ngwanyana, o tlaa boela mo malatsing a bokau jwa gagwe.

²⁶A rapele Modimo, mme o nne pelotshweu kwa go ene; a ba a tle a bone sefatlhogo sa one ka boitumelo; o rebolele motho tshiamo ya gagwe.

²⁷A opele fa pele ga batho, a re: ‘Ke leofile, ka sokamisa sone se se siameng, mme go se ka ga nthusa sepe.

²⁸O rekolotse mowa wa me gore o se ye mo moleteng, botshelo jwa me bo tlaa bona lesedi.’

²⁹Bona, dilo tsotlhe tse Modimo o a di dira, o di direla motho gabedi, ee, gararo.

³⁰Go busa mowa wa gagwe mo moleteng, gore a sedifadiwe ka lesedi la batshedi.

³¹Jobe, o tlhokomele thata, o ntheetse; didimala mme ke tlaa bua.

³²Fa o na le sengwe se o se buang o mphetole; bua, gonne ke rata go go siamisa.

³³Fa go sa nna jalo, o reetse nna; didimala, mme ke tlaa go ruta botlhale.”