Job 32

¹Jalo banna ba bararo bao ba khutla go fetola Jobe, ka a ipona a le tshiamo.

²Foo ga tuka bogale jwa ga Elihu morwa Barakele wa Mobusa, wa losika lwa ga Rame; bogale jwa gagwe jwa tukela Jobe, ka a itshiamisa bogolo go Modimo.

³Gape bogale jwa gagwe jwa tukela ditsala tsa gagwe tse tharo, ka ba se ka ba bona phetolo, le fa go ntse jalo ba sekisitse Jobe.

⁴Jaana Elihu o ne a letile lobaka lwa go bua le Jobe, ka ba le bagolo mo go ene.

⁵E rile Elihu a bona fa go se na phetolo mo melomong ya banna ba bararo bao, bogale jwa gagwe jwa tuka.

⁶Elihu morwa Barakele wa Mobusa a bua a re: “Nna ke lekau, mme lona lo bagologolo; ke gone ka moo ka ikefa, ka boifa go lo bontsha mogopolo wa me.

⁷Ka re: ‘Go ko go bua malatsi, le bontsi jwa dinyaga bo tshwanetse go ruta batho botlhale.’

⁸Mme mowa o gone mo mothong, le go budula ga Mothatayotlhe go tle go ba neye tlhaloganyo.

⁹Ba batona ga se bone ba ba botlhale, le fa e le batsofe ba ba tlhaloganyang katlholo.

¹⁰Ke gone ke rileng: ‘Ntheetsang; le nna ke tlaa lo bontsha mogopolo wa me.’

¹¹“Bonang, ka lebelela mafoko a lona, ka reetsa ditharabololo tsa lona, ka lo no lo fophola se lo tlaa se buang.

¹²Ee, ka lo ela tlhoko, mme go ne go se ope yo o kgonneng Jobe, kgotsa yo o fetotseng mafoko a gagwe mo go lona.

¹³Lo itise, e se re kgotsa lwa re: ‘Re bonye botlhale; Modimo o ka mo fenya, e seng motho;’

¹⁴gonne mafoko a gagwe ga a ka a a ntebisa go nnyatsa; le gone ga nketla ke mo fetola ka dipolelo tsa lona.

¹⁵Ba tseanye, ga ba tlhole ba fetola, ga ba na lefoko lepe le ba le buang.

¹⁶A ke tlaa ba leta, ka ba sa bue, ka ba eme fela ba sa tlhole ba fetola?

¹⁷Le nna ke tlaa fetola ntlheng ya me, le nna ke tlaa ntsha mogopolo wa me.

¹⁸Gonne ke kgotshe mafoko; mowa o o mo teng ga me wa mpatelela.

¹⁹Bonang, mpa ya me e tshwana jaaka bojalwa jwa mofine jo bo se nang botso; jaaka mefalo e meša, e batlile go phanyega.

²⁰Ke tlaa bua, gore ke sehumole, ke tlaa tumolola dipounama tsa me ke fetola.

²¹Ke a go rapela, o se ka wa ntesa ka gobela ope; le gone ga nketla ke raya motho ope maina a a hakang;

²²gonne ga ke itse go raya batho maina a a hakang, Mmopi wa me o ne a ka tla a ntlosa ka bonako.