Job 4

¹Foo ga fetola Elifase wa Motemane, a re:

²“Fa motho a leka go bua nao, a o tlaa nna pelo e botlhoko? Mme e mang yo o ka ithibang mo go bueng?

³Bona, o rutile batho ba le bantsi, o thatafaditse diatla tse di bokoa.

⁴Mafoko a gago a emisitse yo o ne a kgokgweetsega, le mangole a a obegang o a nonotshitse.

⁵Mme jaanong se tsile mo go wena, mme o a idibala; se a go ama, mme o a huduega.

⁶A go boifa Modimo ga gago ga se gone boikanyo jwa gago, le bosenang molato jwa ditsela tsa gago, a ga se jone tsholofelo ya gago?

⁷“Ke a go rapela, o tle o gakologelwe gore e mang yo o kileng a nyelela a se na molato? Kgotsa bathokgami ba kile ba kgaolwa kae?

⁸Ka fa nna ke bonyeng ka teng, ke go re: ba ba lemang boikepo, ba jala bosenyi, ba tle ba robe jone fela.

⁹Ba tle ba nyelediwe ke go hema ga Modimo, ba lailwe ke tsubutlo ya bogale jwa one.

¹⁰Go duma ga tau, le kodu ya tau e e bogale, le meno a ditawana, go robegile.

¹¹Tau e kgolo e tle e bopame ka go tlhoka phologolo, le bana ba tau e namagadi ba phatlalale.

¹²“Jaana ka sebediwa sengwe, ka longwa tsebe ka ga sone.

¹³E rile mo megopolong e e tswang mo diponatshegelong tsa bosigo, motlhang boroko jo bogolo bo tshwereng batho,

¹⁴poifo ya nkwela, le thoromo, e e neng ya roromisa marapo a me otlhe fela.

¹⁵Foo sedimo sengwe sa feta fa pele ga sefatlhogo sa me, nama ya me ya tlhonya bobowa.

¹⁶Sa ema, mme ke se ka ka lemoga ponalo ya sone; ga bo go le sebopego fa pele ga matlho a me, go tuuletse fela, mme ka utlwa lentswe le re:

¹⁷‘A motho yo o swang o ka nna tshiamo bogolo go Modimo? A monna o ka itsheka bogolo go Modiri wa gagwe?

¹⁸Bona, ga o ikanye batlhanka ba one; le baengele ba one o tle o ba neye molato wa boeleele.

¹⁹Bogolo jang bone ba ba agileng mo matlong a seretse, a motheo wa one o leng mo loroleng, a phatlakanngwa jaaka serurubele.

²⁰Gare ga moso le maitsebowa ba tle ba senngwe, ba swele ruri, ba sa tlhokomelwe ke ope.

²¹A megala ya megope ya bone ga e tlhomolwe mo teng ga bone? Ba swe, e bile e le mo go se nang botlhale.’