Job 5

¹“A ko o bitse jaana; a go na le mongwe yo o tlaa go arabang? O tlaa retologela kwa go ofe wa baitshepi?

²Gonne tshwenyego e tle e bolaye motho yoo bonyana, le lefufa le bolaye seeleele.

³Ke bonye ba ba dieleele ba mela metswe, ka hutsa boago jwa gagwe ka tshoganetso.

⁴Bana ba gagwe ba kgakala le polokego, ba tle ba pitlwe mo kgorong, le gone go se na ope yo o ba gololang.

⁵Ba ba bolawang ke tlala ba je thobo ya bone, ba ba ba e ntshe le mo teng ga mitlwa; e bile seru se atlhametse thoto tsa bone.

⁶Gonne patiko ga e tswe mo loroleng le khuduego ga e tlhoge mo mmung;

⁷motho o tsaletswe khuduego jaaka ditlhase tsa molelo di tle di thunyetse kwa godimo.

⁸Mme ka ga me, ke rata go batlela kwa Modimong; ke rata go neela Modimo mafoko a me a tsheko;

⁹o o dirang dilo tse dikgolo le tse di se nang bokankabetso, dilo tse di gakgamatsang, tse di se nang palo.

¹⁰O o nesang pula mo lefatsheng, o tlise metsi mo nageng,

¹¹jalo o beye kwa godimo bone ba ba kwa tlase; ba ba hutsafalang ba golelediwe mo polokegong.

¹²O tle o tsupuetse ditogamaano tsa maferefere, jalo diatla tsa bone di retelelwe ke go dirafatsa maikaelelo a bone.

¹³O tle o tshware matlhale mo boferefereng jwa bone; le kgakololo ya ba ba lesoko e goromelediwe koo.

¹⁴Ba tle ba kgatlhane le lefifi go le motshegare, ba apaape go le motshegare jaaka mo bosigong.

¹⁵O tle o golole mo tšhakeng ya molomo wa bone, e bong motlhoki mo seatleng sa mothati.

¹⁶Jalo mohumanegi a nne le tsholofelo, boikepo bo ithibe molomo.

¹⁷Bona, go sego motho yo Modimo o mo omanyang; ke gone o se ka wa nyatsa kwatlhao ya Mothatayotlhe.

¹⁸Gonne o a tle a tlhokofatse, mme a itse go fapa; a ntshe ntho, mme diatla tsa gagwe di fodise.

¹⁹O tlaa go golola mo dikhuduegong di le thataro; ee, mo go di supa, ga go bosula bope jo bo tlaa go amang.

²⁰E tlaa re mo mosweleng a go golole mo losung; le mo ntweng a go golole mo thateng ya tšhaka.

²¹O tlaa subelwa go betsa ga loleme; le gone ga o ketla o boifa tshenyego mogang e tlang.

²²O tlaa tshega tshenyego le borole; le gone ga o ketla o boifa dibatana tsa lefatshe.

²³Gonne o tlaa bo o na le kgolagano le maje a naga; le dibatana tsa naga di tlaa nna kagiso nao.

²⁴O tlaa itse fa mogope wa gago o le mo kagisong; o tlaa ya go tlhola lesaka la gago, mme ga o ketla o tlhoka sepe.

²⁵O tlaa ba o itse fa losika lwa gago lo tlaa nna logolo, le go re lotsalo lwa gago lo tlaa nna jaaka bojang jwa lefatshe.

²⁶O tlaa fitlha mo phupung ya gago o le botsofe jo bo tletseng jaaka mokoa wa mabele o tle o fitlhe ka o e leng motlha wa one.

²⁷Bona se, re se kheleisitse, mme se ntse jalo; o se utlwe, o bo o se itse, gore se nne molemo mo go wena.”