Job 41

¹“A o ka goga kwena wa e ntshetsa kwa ntle ka kgoge ya tlhapi, kgotsa a o ka gatelela loleme lwa yone ka lodi?

²A o ka tsenya mogala wa mokhasi mo nkong ya yone, kgotsa a o ka phunya lotlhaya lwa yone ka lomapo?

³A e ka go direla mekokotlelo e le mentsi, kgotsa a e ka bua nao mafoko a a bonolo?

⁴A e tlaa dira nao kgolagano ya go ka o e tsaya ya nna motlhanka wa gago ka bosakhutleng?

⁵A o ka tshameka nayo jaaka fa e ka bo e le nonyane? Kgotsa a o tlaa e golegela barweetsana ba gago?

⁶A masomo a batshwari ba ditlhapi a tlaa e ntsha tlhwatlhwa? A ba tlaa e kgaoganya mo bareking?

⁷A o ka rothotha letlalo la yone ka marumo a dikobe, kgotsa tlhogo ya yone ka marumo a ditlhapi?

⁸Baya seatla sa gago mo go yone; o gakologelwe go loma ga yone, mme ga o ketla o tlhola o dira jalo.

⁹Bona, tsholofelo ya go e tshwara ke lefela, a motho ga a tlhoboge le fa a e bona fela?

¹⁰Ga go na ope yo o pelokgale ya go e kgotla; mme foo yo o ka emang fa pele ga me e mang?

¹¹E mang yo o simolotseng a nnaya pele, fa e bo ne ne ke ka busetsa mo go ene? Sengwe le sengwe se se fa tlase ga legodimo lotlhe ke sa me.

¹²“Ga nketla ke didimala ka ga ditokololo tsa yone, le fa e le nonofo e kgolo ya yone, le fa e le popego ya yone e e lekalekanyeng sentle.

¹³E mang yo o ka e khumolotsang seaparo sa ka fa ntle? E mang yo o ka tsenang ka fa teng ga ditlhaya tsa yone tse di tlhatlaganyeng?

¹⁴E mang yo o ka bulang ditswalo tsa sefatlhogo sa yone? Meno a yone a dikologilwe ke therego.

¹⁵Makape a yone a a thata ke pelafalo ya yone, a kitlantswe jaaka e ka bo e le ka sekano se se pitlaganyang.

¹⁶Le lengwe le atamalanye le le lengwe thata, go bile go retelela le phefo go tsena fa gare ga one.

¹⁷A lomaganye mmogo; a ngaparalanye, ga a kake a patologanngwa.

¹⁸Maethimolo a yone a ntsha ditlhase tsa lesedi, matlho a yone a tshwana le dintshi tsa matlho a moso.

¹⁹Ditime tse di tukang di tswa mo ganong la yone, le ditlhase tsa molelo di tswe.

²⁰Mo dinkong tsa yone go tswe mosi jaaka ekete wa pitsa e e apeileng le motsitla o o šang.

²¹Pudulo ya yone e tshuba magala, kgabo ya molelo e tswa mo ganong la yone.

²²Thata e nna mo thamong ya yone, theregiso e bina fa pele ga yone.

²³Matlhatlhagano a nama ya yone a ngaparalanye, a kwenne mo go yone; ga a kake a tshikinngwa.

²⁴Pelo ya yone e kwenne jaaka lentswe; ee, e kwenne jaaka lolwala.

²⁵Fa e itsholetsa, ba ba thata ba boife, be tlhakane tlhogo ka ntlha ya go tlakasela.

²⁶Fa motho a e losa ka tšhaka, ga go thuse sepe, le fa e le ka lerumo, le ka motswi, le ka logong lo lo tlhokoditsweng.

²⁷E kaya tshipi jaaka lotlhaka, le kgotlho jaaka kono fela.

²⁸Motswi ga o kake wa e tshabisa; majana a motsekedi a fetoga dirite mo go yone.

²⁹Melamu e kaiwe jaaka dirite, e tshege go ibalala ga putlela.

³⁰Ka kwa mpeng ga yone go etsa dipeana tse di dintlha di bogale, e e beye sephara ekete ke koloi e fola mo marageng.

³¹E bedise boteng jaaka pitsa, e dire lewatle go nna jaaka setlolo.

³²E dira tsela e e phatsimang morago ga yone; motho a gopole go re boteng bo thuntse.

³³Mo lefatsheng ga go na sepe se se tshwanang nayo, e le se se se nang poifo.

³⁴E tle e lebe sengwe le sengwe se se goletsegileng; ke kgosi godimo ga bana ba boikgodiso botlhe fela.”