Psalms 116

¹Ke rata Jehofa, gonne o utlwile lentswe la me, le mekokotlelo ya me.

²Ka a ntshekegetse tsebe ya gagwe, ke gone ke tlaa nnang ke mmitsa ka ke sa ntse ke tshedile.

³Dikgole tsa loso di ne di ntsentse gare, matlhoko a Bobipo a ntshwere; ka bona tlalelo le bohutsana.

⁴Foo ka bitsa leina la ga Jehofa; ka re: “Jehofa, ke a go rapela, golola mowa wa me.”

⁵Jehofa o pelotshweu, o tshiamo; ee, Modimo wa rona o kutlwelobotlhoko.

⁶Jehofa o boloka ba ba sa tlhalefang; ke ne ke ngotlilwe, mme a mpoloka.

⁷Boela mo boikhutsong jwa gago, wena mowa wa me, gonne Jehofa o go diretse sentle ka mo go feteletseng.

⁸Gonne o golotse mowa wa me mo losong, le matlho a me mo dikeleding, le dinao tsa me gore ke se we.

⁹Ke tlaa sepela fa pele ga Jehofa mo lefatsheng la batshedi.

¹⁰Ke a dumela, gonne ke tlaa bua: “Ke ne ke patikegile thata;”

¹¹ka bua mo go potlakeng ga me, ka re: “Batho botlhe ke maaka fela.”

¹²Ke tlaa ntshetsa Jehofa eng ka ntlha ya masego otlhe a gagwe a o a ntiretseng?

¹³Ke tlaa tsaya senwelo sa poloko, mme ke tlaa bitsa leina la ga Jehofa.

¹⁴Ke tlaa lefela Jehofa maikano a me, ee, fa pele ga batho botlhe ba gagwe.

¹⁵Loso lwa baitshepi ba gagwe lo tlotlega thata mo matlhong a ga Jehofa.

¹⁶Jehofa, ruri ke motlhanka wa gago; ke motlhanka wa gago, ke ngwana wa lelata la gago; o hunolotse dikgolego tsa me.

¹⁷Ke tlaa go isetsa setlhabelo sa tebogo, mme ke tlaa bitsa leina la ga Jehofa.

¹⁸Ke tlaa lefela Jehofa maikano a me, ee, fa pele ga batho botlhe ba gagwe;

¹⁹mo malwapeng a ntlo ya ga Jehofa, mo gare ga gago, wena Jerusalema. Bakang Jehofa.