Psalms 115

¹E seng rona Jehofa, e seng rona, mme naya leina la gago kgalalelo ka ntlha ya kutlwelobotlhoko ya gago, le ka ntlha ya boammaaruri jwa gago.

²Ana merafe e tlaa bo e buelang, e re: “Ana jaana Modimo wa bone o a bo o le kae?”

³Modimo wa rona o kwa magodimong; o dirile ka fa o ratileng ka gone.

⁴Medimo ya bone ya disetwa ke selefera le gouta, ke tiro ya diatla tsa batho fela.

⁵E na le melomo, mme ga e bue; e na le matlho, mme ga e bone;

⁶e na le ditsebe, mme ga e utlwe; e na le dinko, mme ga e dupe;

⁷e na le diatla, mme ga e tshware; e na le dinao, mme ga e tsamaye; le gone ga e bue ka memetso ya yone.

⁸Ba ba e dirang ba tlaa tshwana nayo fela, ee, le mongwe le mongwe yo o ikanyang mo go yone.

⁹Wena Iseraele, o ikanye Jehofa; ke ene thuso ya bone, le thebe ya bone.

¹⁰Lona ba ntlo ya ga Arone, ikanyeng Jehofa; ke ene thuso ya bone, le thebe ya bone.

¹¹Lona ba lo boifang Jehofa, ikanyeng Jehofa; ke ene thuso ya bone, le thebe ya bone.

¹²Jehofa o ntse a re gopotse; o tlaa re segofatsa; o tlaa segofatsa ntlo ya Iseraele; o tlaa segofatsa ntlo ya ga Arone.

¹³O tlaa segofatsa ba ba boifang Jehofa, bannye le bagolo.

¹⁴A Jehofa a lo atise segolo bogolo, lona le bana ba lona.

¹⁵Lo segofadiwe ke Jehofa yo o dirileng legodimo le lefatshe.

¹⁶Magodimo ke magodimo a ga Jehofa; mme lefatshe o le neile bana ba batho.

¹⁷Baswi ga ba bake Jehofa, le fa e le ope yo o fologelang mo tuulalong.

¹⁸Mme rona re tlaa baka Jehofa, go tloga fano gompieno go ya bosakhutleng. Bakang Jehofa.