Psalms 119

¹Go sego bone ba ba itekanetseng mo tseleng, ba sepela mo molaong wa ga Jehofa.

²Go sego ba ba bolokang ditshupo tsa gagwe, ba mmatla ka pelo yotlhe.

³Ee, ba bo ba sa dire tshiamololo epe, ba sepela fela mo ditseleng tsa gagwe.

⁴O re laeletse dikaelo tsa gago, gore re di tlhokomele ka tlhoafalo.

⁵Ao, a bo ditsela tsa me di ka bo ne ne di tlhomametse go tlhokomela ditao tsa gago!

⁶Foo ke ne ke se ketla ke tlhajwa ke ditlhong mogang ke tsayang ditaolo tsotlhe tsa gago tsia.

⁷Ke tlaa go ntshetsa malebogo ka thokgamo ya pelo, mogang ke ithutang dikatlholo tsa gago tse di siameng.

⁸Ke tlaa ela ditao tsa gago tlhoko; a ko o se ka wa ntlogelela ruri. Beth

⁹Ana motho wa lekau o tlaa ntlafatsa tsela ya gagwe ka eng? Ka go e tlhokomela ka fa lefokong la gago.

¹⁰Ke go batlile ka pelo ya me yotlhe fela; a ko o se ka wa ntesa ka timelwa ke ditaolo tsa gago.

¹¹Ke beile lefoko la gago mo pelong ya me gore ke se ka ka go leofela.

¹²A go bakwe Jehofa; nthuta ditao tsa gago.

¹³Ka dipounama tsa me ke kakantse dikatlholo tsotlhe tsa molomo wa gago.

¹⁴Ke ntse ke itumetse mo tseleng ya ditshupo tsa gago mo go kanang ka fa ke itumelela dikhumo tsotlhe.

¹⁵Ke tlaa tlhatlhanya dikaelo tsa gago, ke tlaa tsaya ditsela tsa gago tsia.

¹⁶Ke tlaa ijesa monate mo ditaong tsa gago; ga nketla ke lebala lefoko la gago. Gimel

¹⁷Direla motlhanka wa gago sentle ka pelo e e feteletseng, gore ke tle ke tshele; jalo ke tlaa tsaya lefoko la gago tsia.

¹⁸Budulola matlho a me, gore ke bone dilo tse di gakgamatsang tsa molao wa gago.

¹⁹Ke mojaki fela mo lefatsheng, se ntshubele ditaolo tsa gago.

²⁰Mowa wa me o phatlolwa ke go tlhologelelwa dikatlholo tsa gago ka metlha yotlhe.

²¹O kgalemetse bapelompe, ba ba hutsegileng, ba ba timelelwang ke ditaolo tsa gago.

²²Tlosa kgobo le lonyatso mo go nna; gonne ke bolokile ditshupo tsa gago.

²³Dikgosana le tsone tsa dula, tsa nna tsa ntsheba; mme motlhanka wa gago a nna a tlhatlhanya ditao tsa gago fela.

²⁴Ditshupo tsa gago le tsone di njesa monate; ke digakolodi tsa me. Daleth

²⁵Mowa wa me o ngaparetse lorole; ntsitsibosa ka fa lefokong la gago.

²⁶Ke ne ka kakanya ditsela tsa me, mme wa nkaraba; nthuta ditao tsa gago.

²⁷Ntlhaloganyetsa tsela ya dikaelo tsa gago; jalo ke tlaa tlhatlhanya ditiro tsa gago tse di gakgamatsang.

²⁸Ke nyera mowa ka go imelesega; nthatafatsa ka fa lefokong la gago.

²⁹Tlosa tsela ya maaka mo go nna; o nneye molao wa gago ka pelotshweu.

³⁰Ke itshenketse tsela ya boikanngo; dikatlholo tsa gago ke di tlhomile fa pele ga me.

³¹Ke ngaparetse ditshupo tsa gago; Jehofa, o se ka wa ntlhabisa ditlhong.

³²Ke tlaa taboga mo tseleng ya ditaolo tsa gago, mogang o katolosang pelo ya me. He

³³Nthuta tsela ya ditao tsa gago,

³⁴Nnaya tlhaloganyo, mme ke tlaa boloka molao wa gago; ee, ke tlaa o tlhokomela ka pelo ya me yotlhe fela.

³⁵Ntseisa tsela ya ditaolo tsa gago; gonne ke ja monate mo go tsone.

³⁶Sokololela pelo ya me mo ditshupong tsa gago, e seng mo bopelotshetlheng.

³⁷Faposa matlho a me mo go lebeng boithamako, o ntsitsibose mo ditseleng tsa gago.

³⁸Tlhomamisetsa motlhanka wa gago lefoko la gago, yo ke leng wa poifo ya gago.

³⁹Thibosa kgobo ya me, e ke e tshabang; gonne dikatlholo tsa gago di molemo.

⁴⁰Bona, ke ntse ke tlhologeletswe dikaelo tsa gago; ntsitsibosa mo tshiamong ya gago. Vau

⁴¹A mautlwelobotlhoko a gago a tle mo go nna, Morena, e bong poloka ya gago, ka fa lefokong la gago.

⁴²Jalo ke tlaa bo ke na le go fetola yo o nkgobang; gonne ke ikanya lefoko la gago.

⁴³Lefoko la gago o se ka wa le tlosetsa ruri mo molomong wa me; gonne ke ntse ke solofetse mo dikatlholong tsa gago.

⁴⁴Jalo ke tlaa tlhokomela molao wa gago ka gale, ka bosakhutleng le ka bosaengkae.

⁴⁵Ke tlaa tsamaya ke gololosegile; gonne ke senkile dikaelo tsa gago.

⁴⁶Le gone ke tlaa bua ka ga ditshupo tsa gago, le fa pele ga dikgosi ga nketla ke tlhajwa ke ditlhong.

⁴⁷Ke tlaa ijesa monate mo ditaolong tsa gago, tse ke di ratileng.

⁴⁸Le tsone diatla tsa me, ke tlaa di tsholeletsa kwa ditaolong tsa gago, tse ke di ratileng; mme ke tlaa tlhatlhanya ditao tsa gago. Zain

⁴⁹Gakologelwa lefoko le o le buileng le motlhanka wa gago, gonne o ntsholofeditse.

⁵⁰Ke lone kgomotso ya me mo pitlaganong; gonne lefoko la gago le ntsitsibositse.

⁵¹Ba ba pelompe ba nngongotse segolo thata; le fa go ntse jalo ga ke a ngosela mo molaong wa gago.

⁵²Ke ntse ke gakologetswe dikatlholo tsa gago tsa bogologolo Jehofa, mme ke ikgomoditse.

⁵³Ke tshwerwe ke kgakatsego e e molelo ka ntlha ya baikepi ba ba tlogelang molao wa gago.

⁵⁴Ditao tsa gago e ntse ke tsone dikopelo tsa me mo ntlong ya loeto lwa me.

⁵⁵Ke ntse ke gakologetswe leina la gago, Jehofa, bosigo, mme ke tlhokometse molao wa gago.

⁵⁶Moo ke ntse ke na nago, gonne ke bolokile dikaelo tsa gago. Keth

⁵⁷Jehofa ke kabelo ya me; ke rile, ke tlaa tlhokomela mafoko a gago.

⁵⁸Ke ne ka rapelela lesego la gago thata, ka pelo ya me yotlhe; o nne kutlwelobotlhoko mo go nna, ka fa lefokong la gago.

⁵⁹Ka akanya mekgwa ya me, ka busetsa dinao tsa me mo ditshupong tsa gago.

⁶⁰Ka itlhaganela, ka se ka ka nyafala go tlhokomela ditaolo tsa gago.

⁶¹Megala ya boikepi e ntharile, mme ga ke a lebala molao wa gago.

⁶²Bosigo gare ke tlaa tsoga ke go leboga, ka ntlha ya dikatlholo tsa gago tse di siameng.

⁶³Ke monkana wa botlhe ba ba go boifang, le wa ba ba tlhokomelang dikaelo tsa gago.

⁶⁴Jehofa, lefatshe le tletse kutlwelobotlhoko ya gago; nthuta ditao tsa gago. Teth

⁶⁵O diretse motlhanka wa gago sentle, Jehofa, fela ka fa lefokong la gago.

⁶⁶Nthuta temogo e e molemo, le kitso; gonne ke dumetse ditaolo tsa gago.

⁶⁷E rile ke ise ke patikwe ka timela; mme jaanong ke tlhokomela lefoko la gago.

⁶⁸O molemo, mme o dira molemo; nthuta ditao tsa gago.

⁶⁹Ba ba pelompe ba ntogetse kako; ke tlaa boloka dikaelo tsa gago ka pelo yotlhe ya me.

⁷⁰Pelo ya bone e nonne jaaka mafura, mme nna ke natefelwa mo molaong wa gago.

⁷¹Go ntiretse molemo fa ke ntse ke patikwa; gore ke tle ke ithute ditao tsa gago.

⁷²Molao wa molomo wa gago o molemo mo go nna bogolo go makgolokgolo a gouta le selefera. Yod

⁷³Diatla tsa gago di ntirile tsa ba tsa mpopa; nnaya tlhaloganyo, gore ke ithute ditaolo tsa gago.

⁷⁴Ba ba go boifang ba tlaa mpona, ba itumela; gonne ke solofetse mo lefokong la gago.

⁷⁵Ke a itse Jehofa, fa dikatlholo tsa gago di le tshiamo, le gore o nkutlwisitse botlhoko e le ka go ntshiamisa.

⁷⁶Ke a go rapela, a ko o mme mapelonomi a gago a lorato a nne kgomotso ya me, ka fa lefokong la gago mo motlhankeng wa gago.

⁷⁷A mautlwelobotlhoko a manana a gago a tle mo go nna, gore ke tshele; gonne molao wa gago ke mo go njesang monate.

⁷⁸A ba ba pelompe ba tlhajwe ke ditlhong, gonne ba ntigile ka mo go sa siamang; mme nna, ke tlaa tlhatlhanya dikaelo tsa gago.

⁷⁹A ba ba go boifang ba sokologele mo go nna, mme ba tlaa itse ditshupo tsa gago.

⁸⁰A pelo ya me e itekanele mo ditaong tsa gago; gore ke se ka ka tlhajwa ke ditlhong. Kaf

⁸¹Mowa wa me o idibalela poloka ya gago, mme ke solofetse mo lefokong la gago.

⁸²Matlho a me a lapela lefoko la gago, ka ke ntse ke re: “O tlaa nkgomotsa leng?”

⁸³Gonne ke ntse jaaka sekoo mo mosing fela; le fa go ntse jalo ga ke lebale ditao tsa gago.

⁸⁴Ana malatsi a motlhanka wa gago ke a le kaye? O tlaa dirafatsa katlholo leng mo go ba ba mpogisang?

⁸⁵Ba ba pelompe ba nkepetse mamena, e bong bone ba ba sa nnang ka fa molaong wa gago.

⁸⁶Ditaolo tsa gago tsotlhe di boikanngo; ba mpogisa ka mo go sa siamang; wena, a ko o nthuse.

⁸⁷Ba batlile go nja ba ntshwetsa mo lefatsheng; mme ga ke a ka ka tlogela dikaelo tsa gago.

⁸⁸Ntsitsibosa ka fa mapelonoming a gago; jalo ke tlaa tlhokomela tshupo ya molomo wa gago. Lamed

⁸⁹Jehofa, lefoko la gago le nnetse ruri ka bosakhutleng mo legodimong.

⁹⁰Boikanngo jwa gago bo fitlha mo tshikatshikeng; o tlhomamisitse lefatshe, mme le ntse.

⁹¹Di ntse le gompieno ka fa ditaolelong tsa gago; gonne dilo tsotlhe ke batlhanka ba gago.

⁹²Fa molao wa gago o ka bo o se ka wa nna boitumelo jwa me, nka bo ke nyeletse mo pitlaganong ya me.

⁹³Ga nketla ke lebala dikaelo tsa gago gope; gonne o ntsitsibositse ka tsone.

⁹⁴Ke wa gago, o mpoloke; gonne ke batlile dikaelo tsa gago.

⁹⁵Baikepi ba ntaletse gore ba tle ba ntshenye, mme ke tlaa tlhatlhanya ditshupo tsa gago.

⁹⁶Ke bonye bokhutlo jwa boitekanelo jotlhe; mme taolo ya gago e atlhame thata. Mem

⁹⁷Ana ke rata molao wa gago jang! Ke one go tlhatlhanya ga me ka letsatsi lotlhe.

⁹⁸Ditaolo tsa gago di ntlhalefisa go gaisa baba ba me; gonne di nna le nna ka gale.

⁹⁹Ke na le tlhaloganyo go gaisa baruti botlhe ba me; gonne ditshupo tsa gago ke tsone tlhatlhanyo ya me.

¹⁰⁰Ke tlhaloganya bogolo go batsofe, gonne ke bolokile dikaelo tsa gago.

¹⁰¹Ke thibile dinao tsa me mo ditseleng tsotlhe tse di bosula, gore ke tle ke tlhokomele lefoko la gago.

¹⁰²Ga ke a fapoga dikatlholo tsa gago; gonne o nthutile.

¹⁰³Ana mafoko a gago a botshe jang mo magalapeng a me; ee, a gaisa dinotshe mo molomong wa me.

¹⁰⁴Ke bona tlhaloganyo ka dikaelo tsa gago; ke gone ka moo ke ilang mokgwa mongwe le mongwe wa phoro. Nun

¹⁰⁵Lefoko la gago ke lobone lwa dinao tsa me, le lesedi la tsela ya me.

¹⁰⁶Ke ikanne, mme ke go tlhomamisitse, gore ke tlaa tlhokomela dikatlholo tsa gago tse di siameng.

¹⁰⁷Ke utlwisitswe botlhoko thata; ntsitsibosa Jehofa, ka fa lefokong la gago.

¹⁰⁸Ke a go rapela, Jehofa, a ko o amogele ditshupelo tsa molomo wa me, tse di leng tsa peleego, mme o nthute dikatlholo tsa gago.

¹⁰⁹Mowa wa me o ntse o le mo seatleng sa me fela ka gale; le fa go ntse jalo ga ke lebale molao wa gago.

¹¹⁰Baikepi ba nthaetse ka seru; le fa go ntse jalo ga ke a ka ka timelwa ke dikaelo tsa gago.

¹¹¹Ditshupo tsa gago ke di tseile go nna boswa ka bosakhutleng; gonne tsone, ke boipelo jwa pelo ya me.

¹¹²Ke sokololetse pelo ya me kwa go direng ditao tsa gago ka bosakhutleng, e leng go ya kwa bokhutlong. Samek

¹¹³Ke ila ba ba maitlhomo mabedi, mme molao wa gago one ke a o rata.

¹¹⁴O boitshubelo jwa me, le thebe ya me; ke solofetse mo lefokong la gago.

¹¹⁵Ntlogelang, lona badira bosula, gore ke boloke ditaolo tsa Modimo wa me.

¹¹⁶Nkokotletsa ka fa lefokong la gago, gore ke tshele; a ke se ka ka tlhabisiwa ditlhong ke tsholofelo ya me.

¹¹⁷Ntshegetsa, mme ke tlaa bolokesega; le ditao tsa gago ke tlaa di tsaya tsia ka gale.

¹¹⁸O nyaditse botlhe ba ba timelwang ke ditao tsa gago; gonne tsietso ya bone ke maaka fela.

¹¹⁹O a tle o latlhe baikepi botlhe ba lefatshe jaaka manyelo; ke gone ka mo ke ratang ditshupo tsa gago.

¹²⁰Nama ya me e roromisiwa ke go go boifa; ke bile ke tshaba dikatlholo tsa gago. Ayin

¹²¹Ke dirile katlholo le tshiamiso; se ntlogele mo bapatiking ba me.

¹²²O nne moemedi wa molemo mo boemong jwa motlhanka wa gago; a ba ba bopelompe ba se mpatike.

¹²³Matlho a me a lapela poloka ya gago, le lefoko la gago la tshiamo.

¹²⁴Direla motlhanka wa gago ka fa boutlwelongbotlhoko jwa gago, o nthute ditao tsa gago.

¹²⁵Ke motlhanka wa gago, nnaya tlhaloganyo, gore ke tle ke itse ditshupo tsa gago.

¹²⁶Ke lobaka lwa ga Jehofa go dira; gonne ba thatholotse molao wa gago.

¹²⁷Ke gone ka moo ke ratang ditaolo tsa gago bogolo go gouta, ee, bogolo go gouta e e itshekileng.

¹²⁸Ke gone ka moo ke kayang dikaelo tsa gago tsotlhe ka ga dilo tsotlhe, gore di tshiamo; mme ke ila mokgwa mongwe le mongwe wa phoro. Pe

¹²⁹Ditshupo tsa gago di a gakgamatsa; ke gone ka moo mowa wa me o di bolokang.

¹³⁰Go bolelesega ga mafoko a gago go a senola; go tle go neye ba ba sa tlhalefang tlhaloganyo.

¹³¹Ka momolola molomo wa me, mme ka fegelwa; gonne ke ne ke tlhologeletswe ditaolo tsa gago.

¹³²Sokologela mo go nna, o nkutlwele botlhoko, jaaka o ne o ntse o tle o direle ba ba ratang leina la gago.

¹³³Rulaganya dikgato tsa me mo lefokong la gago; a go se nne boikepo bope jo bo tlaa nnang le taolo mo go nna.

¹³⁴Nthekolola mo patikong ya motho; jalo ke tlaa tlhokomela dikaelo tsa gago.

¹³⁵Phatsimisetsa motlhanka wa gago sefatlhogo sa gago; o bo o nthute ditao tsa gago.

¹³⁶Dinoka tsa metsi di ela mo matlhong a me, ka gobo ba sa tlhokomele molao wa gago. Tsade

¹³⁷O tshiamo, wena, Jehofa; le dikatlholo tsa gago di thokgame.

¹³⁸Ditshupo tsa gago o di laotse mo tshiamong le boikanngo tota.

¹³⁹Tlhoafalo ya me e njele ya mphetsa, gonne baganetsi ba me ba lebetse mafoko a gago.

¹⁴⁰Lefoko la gago le itshekile thata; ke gone ka moo motlhanka wa gago o le ratang.

¹⁴¹Ke monnye, ke bile ke a nyatsega; le fa go ntse jalo ga ke lebale ditao tsa gago.

¹⁴²Tshiamo ya gago ke tshiamo e e sa khutleng, le molao wa gago ke boammaaruri.

¹⁴³phuduego e ntshwere, le tlalelo e e mahehe; le fa go ntse jalo ditaolo tsa gago ke natefelo ya me.

¹⁴⁴Ditshupo tsa gago di tshiamo ka bosakhutleng; nnaya tlhaloganyo, mme ke tlaa tshela. Kof

¹⁴⁵Ke biditse ka pelo ya me yotlhe; nkaraba Jehofa; ke tlaa boloka ditao tsa gago.

¹⁴⁶Ke bileditse koo go wena; mpoloka, mme ke tlaa tlhokomela ditshupo tsa gago.

¹⁴⁷Ka raka mahube a moso, ka goa; ka solofela mo mafokong a gago.

¹⁴⁸Matlho a me a ne a raka ditebeledi tsa bosigo, gore ke tle ke tlhatlhanye lefoko la gago.

¹⁴⁹Utlwa lentswe la me ka fa bopelonoming jwa gago jwa lorato; o ntsitsibose Jehofa, ka fa dikatlholong tsa gago.

¹⁵⁰Ba ba latelang boikepo ba a atamela; ba kgakala le molao wa gago.

¹⁵¹Wena o gaufi Jehofa; ditaolo tsotlhe tsa gago di boammaaruri.

¹⁵²Ke sa le ke itse bogologolo ka ditshupo tsa gago, fa o di tlhometse bosakhutleng. Resh

¹⁵³Gopola patikego ya me, mme o nkgolole; gonne ga ke lebale molao wa gago.

¹⁵⁴Mpuelela mo kgannyeng ya me, o bo o nthekolole; ntsitsibosa ka fa lefokong la gago.

¹⁵⁵Poloko e kgakala le baikepi; gonne ga ba batle ditao tsa gago.

¹⁵⁶Mautlwelobotlhoko a manana a gago a magolo, Jehofa; ntsitsibosa ka fa dikatlholong tsa gago.

¹⁵⁷Ba bantsi babogisi ba me, le baganetsi ba me; le fa go ntse jalo ga ke a ngosela mo ditshupong tsa gago.

¹⁵⁸Ke ne ka leba ba ba dirang ka koko, mme ka utlwa botlhoko ka ba sa tlhokomele lefoko la gago.

¹⁵⁹A ko o gopole ka fa ke ratang dikaelo tsa gago ka gone; ntsitsibosa Jehofa, ka fa bopelonoming jwa gago jwa lorato.

¹⁶⁰Tshobokano ya lefoko la gago ke boammaaruri; nngwe le nngwe ya dikatlholo tsa gago tse di siameng, e eme ka bosakhutleng. Shin

¹⁶¹Dikgosana di mpogisitse ka bomo; mme pelo ya me e eme mo go sisimogeng lefoko la gago.

¹⁶²Ke itumela ka lefoko la gago, jaaka motho yo o bonang thopo e kgolo.

¹⁶³Ke ila maaka, a mphedisa pelo ruri; molao wa gago ke a o rata.

¹⁶⁴Ke tle ke go bake gasupa ka letsatsi, ka ntlha ya dikatlholo tsa gago tse di siameng.

¹⁶⁵Ba ba ratang molao wa gago ba na le kagiso e kgolo; ga ba na go kgopiwa gope.

¹⁶⁶Jehofa, ke ntse ke solofetse poloka ya gago, mme ke dirile ditaolo tsa gago.

¹⁶⁷Mowa wa me o tlhokometse ditshupo tsa gago; ke di rata segolo thata.

¹⁶⁸Ke tlhokometse dikaelo tsa gago, le ditshupo tsa gago; gonne mekgwa yotlhe ya me e fa pele ga gago. Tau

¹⁶⁹A go goa ga me go atamele fa pele ga gago Jehofa; nnaya tlhaloganyo ka fa lefokong la gago.

¹⁷⁰A mekokotlelo ya me e fitlhe fa pele ga gago; nkgolola ka fa lefokong la gago.

¹⁷¹A dipounama tsa me di bue pako; gonne o nthuta ditao tsa gago.

¹⁷²A loleme lwa me lo opele lefoko la gago; gonne ditaolo tsotlhe tsa gago di tshiamo.

¹⁷³A seatla sa gago se iketleeletse go nthusa; gonne ke itshenketse dikaelo tsa gago.

¹⁷⁴Ke tlhologeletswe poloka ya gago, Jehofa; molao wa gago ke o o njesang monate.

¹⁷⁵A mowa wa me o tshele, mme o tlaa go baka; le dikatlholo tsa gago di ntshuse.

¹⁷⁶Ke timetse jaaka nku e e ileng le naga; batla motlhanka wa gago; gonne ga ke lebale ditaolo tsa gago.