Psalms 120

¹E rile ke le mo pitlaganong ka tlhaeleletsa kwa go Jehofa, mme a nkaraba.

²Jehofa, golola mowa wa me mo dipounameng tse di akang, le mo lolemeng lo lo boferefere.

³Wena loleme lo lo boferefere, o tlaa newa eng? Kgotsa o tlaa dirwa eng gape?

⁴Metswi e e bogale ya ba ba dinatla, e na le magala a mokala.

⁵A bo go latlhega nna, ka ke jakile mo Mešeke, ka ke agile mo megopeng ya Ketare.

⁶Mowa wa me ga o bolo go aga le ene yo o ilang kagiso.

⁷Nna ke rata kagiso; mme fa ke bua, bone ba rata ntwa fela.