Psalms 149

¹Bakang Jehofa. Opelelang Jehofa sefela se seša, le pako ya gagwe mo phuthegong ya baitshepi.

²A Iseraele a itumele mo go ene yo o mo dirileng; bana ba Sione ba ipele mo kgosing ya bone.

³A ba bake leina la gagwe ka go bina; a ba mo opelele dipako ka moropana le harepe.

⁴Gonne Jehofa o na le kgatlhego mo bathong ba gagwe; o tlaa kgabisa ba ba pelonomi ka poloko.

⁵A baitshepi ba kgane ka boitumelo mo kgalalelong; a ba opele ka boitumelo ba le mo malaong a bone.

⁶A dipako tse dikgolo tsa Modimo di nne mo molomong wa bone le tšhaka e e magale mabedi e nne mo diatleng tsa bone:

⁷Go dirafatsa pusoloso mo merafeng, le dipetso mo ditšhabeng;

⁸go golega dikgosi tsa tsone ka diketane, le barena ba tsone ka dikgolego tsa tshipi;

⁹go dirafatsa mo go bone katlholo e e kwadilweng; tlotlo e, baitshepi botlhe ba gagwe ba na nayo. Bakang Jehofa.