Psalms 2

¹Ana merafe e šakgaletseng, le ditšhaba di tlhatlhanyetsang selo sa boithamako?

²Dikgosi tsa lefatshe di a ikemisa, le balaodi ba logisanya maano, ka ga Jehofa, le ka Motlodiwa wa gagwe, ba re:

³“A re kgaoleng dithapo tsa bone, le megala ya bone re e latlhe mo go rona.”

⁴Ene yo o dutseng mo magodimong o tlaa tshega; Jehofa o tlaa ba sotla.

⁵Ke gone foo o tlaa buang nabo ka bogale jwa gagwe jo bogolo, o tlaa ba rema marapo ka bogale jwa gagwe jo bo tukang:

⁶“Le fa go ntse jalo ke tlhomile kgosi ya me mo thabeng ya me e e boitshepo ya Sione.”

⁷Ke tlaa bolela ka ga taolo; Jehofa o ntheile a re: “O morwaake; ka tsatsi leno ke go tsetse.

⁸Ntopa, mme ke tlaa go naya merafe go nna boswa jwa gago, le dikhutlo tsa lefatshe go nna thuo ya gago.

⁹O tlaa ba thubakanya ka tsamma ya tshipi; o tlaa ba phatlakanya jaaka sejana sa mmopi.”

¹⁰Ke gone jaana tlhalefang, lona dikgosi; lo rutege, lona baatlhodi ba lefatshe.

¹¹Direlang Jehofa ka poifo, mme lo itumele ka tlakaselo.

¹²Atlang morwa, gore e se re gongwe a galefa, mme lwa nyelela mo tseleng, gonne bogale jwa gagwe bo tlaa akofa bo tuka. Go sego bone botlhe ba ba mo ikanyang.