Psalms 38

¹Jehofa, a ko o se ka wa nkgalemela ka bogale jwa gago; le gone o se ka wa nkwatlhaya ka bogale jwa gago jo bo tukang.

²Gonne metswi ya gago e tsepame mo go nna, seatla sa gago le sone se nkgateletse mo go botlhoko.

³Ga go na boitekanelo bope mo nameng ya me ka ntlha ya kgakalo ya gago; le gone ga go na go fola gope mo marapong a me ka ntlha ya boleo jwa me.

⁴Gonne ditshiamololo tsa me di khurumeditse tlhogo ya me, fela jaaka morwalo o o bokete, di a nkimela.

⁵Dikweneso tsa me di a nkga, di bodile, ka ntlha ya boeleele jwa me.

⁶Ke a segega, ke bile ke hutaganye thata; ke tlhola ke ntse ke hutsafetse motshegare otlhe.

⁷Gonne lotheka lwa me lo tletse phisego; ga go na boitekanelo bope mo nameng ya me.

⁸Ke a idibala, ke tapetegile mo go botlhoko; ke gwetlisitswe ke go tlhoka go ikhutsa ga pelo ya me.

⁹Morena, keletso ya me yotlhe e fa pele ga gago; le go duma ga me ga go a go fitlhegela.

¹⁰Pelo ya me e a tlolatlola, thata ya me e a mphelela; ka ga lesedi la matlho a me, le lone le ntlogetse.

¹¹Barati ba me le ditsala tsa me ba emetse sebetso sa me fa thoko; le ba losika lwa me ba emetse kgakala.

¹²Le ba ba tsomang botshelo jwa me, ba mpeela dirai; le ba ba batlang go nkutlwisa botlhoko ba bua dilo tsa bosenyi, ba akanya ditsietso ka letsatsi lotlhe.

¹³Mme nna, jaaka motho yo o bosusu, ga ke utlwe; ke ntse jaaka motho yo o semumu, yo o sa tsweng molomo.

¹⁴Ee, ke ntse jaaka motho yo o sa utlweng le yo go se nang dikgalemo mo molomong wa gagwe.

¹⁵Gonne ke solofetse mo go wena, Jehofa; o tlaa araba, Morena, Modimo wa me.

¹⁶Gonne ke rile: “Ba ka tla ba itumela ka nna; ya re lonao lwa me lo relela, ba inkgodisetsa.”

¹⁷Gonne ke a kwetsepela, le bohutsana jwa me bo fa pele ga me ka gale.

¹⁸Gonne ke tlaa bolela boikepo jwa me; ke tlaa hutsafalela boleo jwa me.

¹⁹Baba ba me bone, ba tlhaga, ba thata; le ba ba nkilang ka go sa siamang ba ntsifetse;

²⁰le ba ba lefelang molemo ka bosula ke baganetsi ba me, ka gobo ke latelela selo se se molemo.

²¹A ko o se ka wa ntlogela, Jehofa; Modimo, a ko o se nne kgakala le nna.

²²A ko o itlhaganelele go nthusa Morena, poloka ya me.