Psalms 44

¹Modimo, re ikutlwetse ka ditsebe tsa rona, borraarona ba re boleletse, tiro e o kileng wa e dira mo metlheng ya bone, mo metlheng ya bogologolo.

²Wa nna wa leleka merafe ka seatla sa gago, mme wa tlhoma bone; wa patika ditšhaba, wa di phatlalatsa.

³Gonne ga ba a ka ba tsaya lefatshe go le rua ka tšhaka ya bone, le gone letsogo la bone ga le a ka la ba boloka; fa e se ka seatla sa gago se segolo, le letsogo la gago, le lesedi la sefatlhogo sa gago, ka gobo o le ntlheng ya bone.

⁴Wena Modimo, o Kgosi ya me; laolela Jakobe kgololo.

⁵Re tlaa diga baba ba rona ka wena; ba ba re tsogologelang re tlaa ba gataka ka leina la gago.

⁶Gonne ga nketla ke ikanya bora jwa me; tšhaka ya me le yone ga e ketla e mpoloka.

⁷Wena o re bolokile mo babeng ba rona, le ba ba re ilang o ba tlhabisitse ditlhong.

⁸Re tlhotse re kgana ka Modimo letsatsi lotlhe; leina la gago re tlaa le ntshetsa malebogo ka bosenabokhutlo. Sela.

⁹Jaana o re latlhile, o re tlotlolotse; ga o bolole le dintwa tsa rona.

¹⁰O re buseditse kwa morago ra tshaba mmaba; mme ba ba re ilang ba ikgapela ka go rata.

¹¹O re abile jaaka dinku tse di tlhaoletsweng go jewa, o re gasagasitse mo merafeng.

¹²O rekisa batho ba gago ka lefela, mme ga o a oketsa khumo ya gago ka tlhwatlhwa ya bone.

¹³O re dira kgobo mo go bankarona, tshotlo le setshego mo go ba ba mo tikologong ya rona.

¹⁴O re tlhabile seane mo merafeng, le thukhutho tlhogo mo ditšhabeng.

¹⁵Go tlotlologa ga me go fa pele ga me ka letsatsi lotlhe, ke bipilwe ke ditlhong tsa sefatlhogo sa me.

¹⁶Ka ntlha ya lentswe la yo o kgobang le yo o tlhapatsang; le ka ntlha ya mmaba le mmusolosi.

¹⁷Gotlhe mo go re wetse; le fa go ntse jalo ga re a go lebala, le gone ga re a dira ka tsietso mo kgolaganong ya gago.

¹⁸Pelo ya rona ga e a boela kwa morago le gone dikgato tsa rona ga di a theoga mo tseleng ya gago;

¹⁹le fa o re thubaganyeditse mo mannong a bophokoje, o re khurumeditse ka moriti wa loso.

²⁰A e re fa re kile ra lebala leina la Modimo wa rona, kgotsa ra otlololela modimo o sele mabogo a rona;

²¹a goo mo, Modimo a ga o ketla o go tlhotlhomisa? Ka one o itse maoma a pelo.

²²Ee, re tlhola re bolawa ka ntlha ya gago ka letsatsi lotlhe; re kaiwa jaaka dinku tsa go tlhajwa.

²³Morena tsoga! O robaletseng? Tloga o eme, se re latlhele ruri ka bosakhutleng.

²⁴O fitlhelang sefatlhogo sa gago, wa lebala go patikwa ga rona le go bolawa ga rona jaana?

²⁵Gonne mowa wa rona o obegetse mo loroleng; mpa ya rona e ngaparetse mmu.

²⁶Tsogela go re thusa, mme o re rekolole ka ntlha ya bopelonomi jwa gago jwa lorato.