Psalms 49

¹Lona ditšhaba tsotlhe, utlwang mo; sekegang tsebe, lona banni botlhe ba lefatshe.

²Go le babotlana le bagolwane, bahumi le bahumanegi mmogo.

³Molomo wa me o tlaa bua botlhale; le go akanya ga pelo ya me e tlaa nna ka ga tlhaloganyo.

⁴Ke tlaa sekegela setshwantsho tshebe ya me; ke tlaa rarabolola ka harepe polelo ya me e e raraanyeng.

⁵Ana ke tlaa bo ke boifelang mo metlheng ya bosula? Mogang go boikepo jo bo tlhomereng direthe tsa me bo ntsenyang gare?

⁶Mo go ba ba ikanyang lohumo lwa bone, ba belafala ka bontsi jwa dikhumo tsa bone.

⁷Ga go na ope yo o ka rekololang ngwana wa ga rraagwe ka gope, le fa e le go mo ntshetsa serekololo go se naya Modimo.

⁸(Gonne thekololo ya mowa wa bone e topo e thata, e na le go tlhobogwa ka bosakhutleng;)

⁹gore a tle a nne a tshele ka metlha yotlhe, gore a se ka a bona go bola.

¹⁰Gonne o a bona fa batho ba ba botlhale ba swa fela, yo o bosilo le yo o sefolofolo ba nyalele fela mmogo, ba tlogelele ba sele khumo ya bone.

¹¹Diphupu tsa bone ke magae a bona ka bosakhutleng; ke fa ba nnetseng teng ruri; le fa ba ne ba ntse ba kaya mafatshe go re ke a bone.

¹²Motho ene, a le mo tlotlong ga a nnele ruri; o tshwana jaaka diphologolo tse di nyelelang.

¹³Mokgwa o wa bone ke boeleele fela jwa bone, le fa go ntse jalo e a tle e re morago ga bone batho ba tle ba dumele dipolelo tsa bone. Sela.

¹⁴Ba laoletswe Bobipo jaaka letsomane la dinku fela. Loso o tlaa nna modisa wa bone; mo mosong bathokgami ba tlaa nna le puso mo go bone, le bontle jwa bone bo tlaa nna sejo sa Bobipo gore bonno jwa jone bo se ka jwa nna.

¹⁵Mowa wa me Modimo o tlaa o rekolola mo thateng ya Bobipo, gonne o tlaa ntshola. Sela.

¹⁶O se ka wa boifa fa mongwe a humisiwa, fa kgalalelo ya ntlo ya gagwe e totisiwa;

¹⁷ka gobo fa a swa, ga a ketla a ya le sepe; kgalalelo ya gagwe ga e ketla e fologela morago ga gagwe.

¹⁸Le fa a rile a sa tshedile a segofatsa mowa wa gagwe, ka batho le gale ba tle ba go bake fa o itirela molemo,

¹⁹o tlaa ya lesomong la borraagwe; ga ba ketla ba bona lesedi gope.

²⁰Motho yo o mo tlotlegong, mme a se na tlhaloganyo, o tshwana fela le diphologolo tse di nyelelang.