Psalms 48

¹O mogolo Jehofa, o na le go bakwa segolo mo motseng wa Modimo wa rona, mo thabeng ya one e e boitshepo.

²E ntle thaba ya Sione, ka go golela godimo, e itumelelwa ke lefatshe lotlhe, ka fa ntlheng ya botsheka, motse wa Kgosi e kgolo.

³Modimo o ikitsisitse mo matlong a gone a dikgosi fa o le botshabelo.

⁴Gonne, bonang, dikgosi tsa phuthega, mme tsa feta mmogo.

⁵Di ne tsa go bona, foo tsa gakgamala thata; tsa tsielwa, tsa itlhaganela tsa ya koo.

⁶Thoromo ya di tshwara teng; le botlhoko jaaka jwa mosadi yo o mo pelegong.

⁷Wa thuba dikepe tsa Tarešiše ka phefo ya botlhabatsatsi.

⁸Jaaka re utlwile, re bonye fela jalo mo motseng wa ga Jehofa wa masomosomo, mo motseng wa Modimo wa rona; Modimo o tlaa o tlhomamisa ka bosenabokhutlo. Sela.

⁹Re akantse bopelonomi jwa gago jwa lorato, Modimo, mo gare ga tempele ya gago.

¹⁰Fela jaaka leina la gago le ntse, Modimo, pako ya gago le yone e ntse jalo kwa dikhutlong tsa lefatshe; seatla sa gago se se siameng se tletse tshiamo.

¹¹A thaba ya Sione e itumele, le bomorwadia Juta ba ipele, ka ntlha ya dikatlholo tsa gago.

¹²Tlalatlalang le Sione, lo bo lo o potonoge; balang dikago tsa one tse di godileng tsa phemelo.

¹³Lo tlhokomele sentle dithako tsa phemelo tsa one, lo akanye matlo a one a dikgosi; gore lo tle lo bolelele losika lo lo tlang.

¹⁴Gonne Modimo one, ke Modimo wa rona ka bosakhutleng le ka bosaengkae; one o tlaa nna mosupatsela wa rona le go ya fela mo losong.