Psalms 51

¹Nkutlwela botlhoko Modimo, ka fa bopelonoming jwa gago jwa lorato, ka fa bontsing jwa mautlwelobotlhoko a gago, o phimole ditlolo tsa me.

²Ntlhapisetsa ruri mo boikepong jwa me, o nntlafatse mo boleong jwa me.

³Gonne ke ipolela ditlolo tsa me, le boleo jwa me bo ntutse pele ka gale.

⁴Ke wena, wena wesi yo ke go leofetseng, ka dira se se bosula mo ponong ya gago, gore o tle o bonwe o le tshiamo mogang o buang, o bo o nne phepa mogang o atlholang.

⁵Bona, ke ne ka bopegela mo boikepong; mmé mmè a nkamogelela mo boleong.

⁶Bona, o eletsa boammaaruri mo ditennyeng; le mo bokaeng jo bo fitlhegileng o tlaa nkitsise botlhale.

⁷Ntshekisa ka mosiama, mme ke tlaa itsheka; ntlhapisa, mme ke tlaa nna mosweu bogolo go kapoko.

⁸Nkutlwisa boitumelo le boipelo; gore marapo a o a robileng a tle a itumele.

⁹Subela dibe tsa me sefatlhogo sa gago; o bo o phimole maikepo a me otlhe fela.

¹⁰Modimo, bopa pelo e e itshekileng mo go nna; o bo o šafatse mowa o o siameng mo teng ga me.

¹¹O se ka wa ntatlha, wa ntlosa fa pele ga gago; le mowa wa gago o o boitshepo o se o tlose mo go nna.

¹²Nthebolela boitumelo jwa poloka ya gago; o ntshegetse ka mowa o o phuthologileng.

¹³Foo ke tlaa ruta batlodi ditsela tsa gago; le baleofi ba tlaa sokologela kwa go wena.

¹⁴Nkgolola mo molatong wa go tsholola madi Modimo, wena Modimo wa poloko ya me; loleme lwa me lo tlaa opelela godimo ka ga tshiamo ya gago.

¹⁵Jehofa, bula dipounama tsa me; mme molomo wa me o tlaa bolela pako ya gago.

¹⁶Gonne ga o natefelwe ke setlhabelo; nkabo ke se ntsha; ga o na kgatlhego mo tshupelong e e fisiwang.

¹⁷Ditlhabelo tsa Modimo ke mowa o o phatlogileng; pelo e e phatlogileng, e e ngomogileng ga o ketla o e nyatsa Modimo.

¹⁸Direla Sione molemo ka fa natefelong ya gago; aga dithako tsa Jerusalema.

¹⁹Ke gone o tlaa natefelwang ke ditlhabelo tsa tshiamo, le ke tshupelo e e fisiwang, le tshupelo e e fisiwang e le mmogo; ke gone ba tlaa isang dikgomo ditlhabelo mo sebesong sa gago.