Psalms 58

¹A ruri lo tle lo bue tshiamo ka go didimala? A lo tle lo atlhole ka thokgamo, lona bana ba batho?

²Ee, lo dira tshiamololo mo pelong; lo lekanyetsa go thubaka ga diatla tsa lona kwa ntle mo lefatsheng.

³Baikepi ba sa le ba nna ba sele ba sa tswa sebopelong; ya re ba sa ntse ba belegwa ba timele ka go bua maaka.

⁴Botlhoko jwa bone bo tshwana le botlhoko jwa noga; ba tshwana le lebolobolo le le sa utlweng, le le thibang tsebe ya lone,

⁵e le le le sa reetseng lentswe la batshereanyi, le fa go ka tshereanngwa ka botlhale jo bo ntseng jang.

⁶Roba meno a bone, Modimo, mo melomong ya bone; roba, o ntshe meno a matona a ditawana, Jehofa.

⁷A ba nyelele jaaka metsi a a seselang; e tle e re a kaya metswi ya gagwe, e nne jaaka ekete e pomilwe.

⁸A ba nne jaaka kgopa e e tlhapologang e ba e nyelela, jaaka tshenyegelo ya mosadi, e e se kang ya bona letsatsi.

⁹E re pele dipitsa tsa lona di e se di utlwe molelo wa mitlwa, o tlaa e tlosa ka setsuatsue, e e metsi le e e tukang mmogo.

¹⁰Mosiami o tlaa itumela mogang o bonang pusoloso; o tlaa itlhapisa dinao mo mading a baikepi.

¹¹Jalo batho ba bo ba tlaa re: “Ruri go na le tuelo e e nnetseng mosiami; ruri Modimo o gone o o atlholang mo lefatsheng.”