Psalms 59

¹Modimo wa me nkgolola mo babeng ba me; o mpeye kwa godimo, ke tswe mo go ba ba ntsogologelang.

²Nkgolola mo badiring ba boikepo, o bo o mpoloke mo bathong ba ba ratang go tsholola madi.

³Gonne bona, ba laletse mowa wa me; ba ba thatathata ba a mphuthegela, e seng ka ntlha ya tlolo ya me, le fa e le ka ntlha ya boleo jwa me, Jehofa.

⁴Ba tle ba siane, ba iketleetse kwa ntle ga molato wa me; tsogela go nthusa, mme o bone.

⁵E bong wena, Jehofa, Modimo wa masomosomo, Modimo wa Iseraele, a ko o tsogele go ya go lekola merafe yotlhe; o se ka wa utlwela batlodi bape ba ba ikepang botlhoko. Sela.

⁶Ba tle ba boe ka maabanyane, ba kue jaaka ntša, ba potologe motse.

⁷Bona, ba tle ba kgobole ka legano la bone; ditšhaka di mo dipounameng tsa bone, ka ba tle ba re: “Go utlwa mang?”

⁸Mme wena Jehofa o tlaa ba tshega; o tlaa sotla ka merafe yotlhe.

⁹Ao, thata ya me, ke tlaa lebelela mo go wena; gonne Modimo ke kago ya me e e godileng ya phemelo.

¹⁰Modimo wa boutlwelobotlhoko jwa me o tlaa ntlela pele; Modimo o tlaa mma ke bona keletso ya me mo babeng ba me.

¹¹O se ka wa ba bolaya, e tlaa re gongwe batho ba me ba lebale; ba falatse ka thata ya gago, o ba folose, Jehofa thebe ya rona.

¹²Ka ntlha ya boleo jwa molomo wa bone, le mafoko a dipounama tsa bone, a ba tshwarwe fela mo bopelompeng jwa bone, le ka ntlha ya go hutsakanya le go aka mo ba go buang.

¹³Ba nyeletse mo bogaleng jo bogolo, o ba nyeletse gore ba tle ba se ka ba tlhola ba le gone; mme a ba itse fa Modimo o laola mo go Jakobe, go ya kwa dikhutlong tsa lefatshe. Sela.

¹⁴Mme a e re ka maabanyane ba bo ba kue jaaka ntša, ba potologe motse.

¹⁵Ba tlaa kailakaila go batla dijo, ba tlaa lala ba diegile bosigo jotlhe fa ba sa bone go kgora.

¹⁶Mme nna, ke tlaa opela ka ga thata ya gago; ee, mo mosong ke tlaa dudueletsa godimo ka ga boutlwelobotlhoko jwa gago, ka gobo o ntse o le kago ya me e e godileng ya phemelo, le botshabelo mo letsatsing la pitlagano ya me.

¹⁷Wena, Thata ya me, ke tlaa go opelela dipako, ka gobo Modimo ke kago ya me e e godileng ya phemelo, Modimo wa boutlwelobotlhoko jwa me.