Psalms 64

¹Utlwa lentswe la me, Modimo, mo boitokong jwa me; dibela botshelo jwa me mo go boifeng mmaba.

²Ntshubela kgakololo ya mo sephiring ya badira bosula; mo pheretlhong ya badiri ba boikepo;

³ba ba looditseng loleme lwa bone jaaka tšhaka, ba kaile metswi ya bone e e leng mafoko a a galakang;

⁴gore e tle e re ba le mo maipobong ba hule yo o itekanetseng; ba mo hule ka tshoganetso, mme ba sa boife.

⁵Ba itlhoafatsa mo boikaelelong jo bo bosula; ba bue mmogo ka ga go baya diru ka boiphitlho, ba re: “E mang yo o tlaa di bonang?”

⁶Ba tle ba tlhotlhomise maikepo, ba re: “Re sweditse tatelelo gotlhe, ka boitshoko.” Mme mogopolo o o kwa teng wa mongwe le mongwe o boteng, le yone pelo.

⁷Modimo o tlaa ba hula; ba tlaa kwenesiwa ka tshoganetso ka motswi.

⁸Jalo ba tlaa kgokgoediwa, loleme lwa bone ka bosi lo ntse lo ba nyatsa; botlhe ba ba ba bonang ba tlaa ribaribetsa ka ditlhogo.

⁹Batho botlhe ba tlaa boifa; mme ba tlaa bolelo tiro ya Modimo, le go dira ga one ba tlaa go akanya ka botlhale.

¹⁰Basiami ba tlaa itumela mo go Jehofa, ba tlaa ikanya mo go ene; botlhe ba ba pelo e e thokgameng ba tlaa ja koma.