Psalms 69

¹Mpoloka Modimo, gonne metsi a tseneletse mowa wa me.

²Ke roromela mo morageng o o boteng, kwa go se nang boemo; ke fitlhile mo metsing a a boteng, kwa merwalela e nkhurumetsang gone.

³Ke lapisitswe ke go lela ga me; memetso ya me e phaphaletse; matlho a me a tlhaela ka ke lebeletse Modimo wa me.

⁴Ba ba ntlhoileng ka bomo fela ba bantsi bogolo go meriri ya tlhogo ya me; ba ba ratang ba kabo ba nkgaola, e le baba ba me ka go sa siamang, ba thata thata; gone foo, ka rebola se ke sa se tsayang.

⁵Modimo o a bo itse boeleele jwa me; le maleo a me ga a go subegela.

⁶Ba ba go lebeletseng a ba se tlhajwe ke ditlhong ka nna, Jehofa, Modimo wa masomosomo; ba ba go batlang a ba se tlisiwe mo tlotlologong ka nna, Modimo wa Iseraele.

⁷Gonne ke bogisegile kgobo ka ntlha ya gago; ditlhong di bipile sefatlhogo sa me.

⁸Ke ntse moeng mo go bomorwa rre; ke motho o sele mo baneng ba ga mme.

⁹Gonne tlhoafalelo ya ntlo ya gago e njele; e bile dikgobo tsa ba ba go kgobang di wetse mo go nna.

¹⁰E rile ke lela ke otlhaya mowa wa me ka go ikitsa go ja, ya nna kgobo mo go nna.

¹¹E rile ke dira letsela la kgetse go nna seaparo sa me, ka tloga ka tswa seane mo go bone.

¹²Ba ba tleng ba dule fa kgorong ba bua ka ga me; ke bile ke pina ya matagwa.

¹³Ka ga me, morapelo wa me o koo go wena, Jehofa, mo motlheng o o lebosegang; Modimo, mo bontsing jwa boutlwelobotlhoko jwa gago, o nkarabe mo boammaaruring jwa poloka ya gago.

¹⁴Ntshwatola mo morageng, mme o se ka wa ntesa ka roromela; a ke gololwe mo go ba ba ntlhoileng, mme ke tswe mo metsing a a boteng.

¹⁵A morwalela wa metsi o se mphikame; le gone a bodiba jo bo botengteng bo se ka jwa nkometsa, mme molete o se ntswalele molomo ke le mo teng.

¹⁶Nkaraba, Jehofa, ka gobo bopelonomi jwa gago jwa lorato bo molemo, ka fa bontsing jwa mapelonolo a manana a gago, retologela kwa go nna.

¹⁷O se ka wa subela motlhanka wa gago sefatlhogo sa gago; gonne ke mo pitlaganong; nkaraba ka bonako.

¹⁸Atamela mowa wa me, o o golole; nthekolola ka ntlha ya baba ba me.

¹⁹Kgobo ya me o a e itse, le ditlhong tsa me, le tlotlologo ya me; baganetsi ba me botlhe fela ba fa pele ga gago.

²⁰Kgobo e phatlotse pelo ya me; ke imelesegile pelo, ka senka bangwe ba ba ka tlhomogang pelo; mme go ne go se na ope; le bagomotsi, mme ka se ka ka bona ope.

²¹Ba bile ba nnaya santlhokwe go nna sejo sa me; le mo go nyorweng ga me ba nnaya bojalwa jo bo botšarara go bo nwa.

²²A lomati lwa bojelo lwa bone lo tswe serai fa pele ga bone; a e re ba le mo kagisong, lo tle lo nne seru fela.

²³A matlho a bone a fifale gore ba se bone; o bo o roromise ditheka tsa bone ka metlha yotlhe.

²⁴Ba goromeletse bogale jwa gago, mme a kgakalo ya bogale jwa gago e ba tshware.

²⁵A boago jwa bone bo nne tshwafalo fela; a go se age ope mo megopeng ya bone.

²⁶Gonne ba bogisa ene yo o mo iteileng; ba bolele bohutsana jwa ba o ba kwenesitseng.

²⁷Oketsa boikepo jwa bone ka boikepo, mme ba se tle mo tshiamong ya gago.

²⁸A ba phimolwe mo lokwalong lwa botshelo, ba se ka ba kwalwa le basiami.

²⁹Nna ke lehuma fela, le bohutsana fela; a poloka ya gago Modimo e mpeye kwa godimo.

³⁰Ke tlaa baka leina la Modimo ka sefela; ke tlaa o goletsa ka go ntsha malebogo.

³¹Go tlaa kgatlha Jehofa bogolo go kgomo, le fa e le pholo e e nang le dinaka le ditlhako.

³²Bapelonomi ba go bonye, mme ba itumela; lona ba lo senkang Modimo, a pelo tsa lona di tshele.

³³Gonne Jehofa o utlwa batlhoki, o bile a sa nyatse bagolegwi ba gagwe.

³⁴A legodimo le mmake le lefatshe, le mawatle, le tsotlhe tse di bukunyang mo go one.

³⁵Gonne Modimo o tlaa boloka Sione, o tlaa aga metse ya Juta; mme ba tlaa nna gone, ba tlaa nna nayo e le boswa jwa bone.

³⁶Losika lwa batlhanka ba one le lone lo tlaa go rua; le ba ba ratang leina la one ba tlaa aga gone.