Psalms 68

¹A Modimo o nanoge; a baba ba one ba faladiwe; le ba ba o ilang ba tshabe fa pele ga one.

²Jaaka mosi o tle o figitlhediwe, ba figitlhetse jalo; jaaka makgaga a tle a tlhapologe fa pele ga molelo, a baikepi ba nyelele jalo ka sebonalo sa Modimo.

³Mme a basiami ba itumele; ba kgane ka boitumelo fa pele ga Modimo; ee, a ba itumele ka boipelo.

⁴Opelelang Modimo, opelelang leina la one dipako; o o ralalang dipoa tsa naga o pagame, lo o direle tsela ya mheru; leina la one ke JAH; lo bo lo kgane ka boitumelo fa pele ga one.

⁵Modimo ke rramasiela, le moatlholedi wa basadi ba batlholagadi mo boagong jwa one jo bo boitshepo.

⁶Ba ba lore, Modimo o tle o ba dire motse; bagolegwi o ba ntshetse go kokotlegela; mme batsuolodi bone, ba agile mo lefatsheng la lokgere.

⁷Modimo, e rile o bolola fa pele ga batho ba gago, e rile o ralala naga ka kgagamalo, Sela;

⁸lefatshe la roroma, magodimo le one a rotha ka sebonalo sa Modimo; le e leng Sinai yole, a roroma ka sebonalo sa Modimo, Modimo wa Iseraele.

⁹Wena, Modimo, wa nesa pula e kgolo, wa rakalatsa ba boswa jwa gago jale ka ba ne ba ngodiegile.

¹⁰Phuthego ya gago ya aga gone; wena Modimo, wa etleeletsa bahumanegi ka se se tswang mo molemong wa gago.

¹¹“Jehofa o tle a ntshe lefoko, basadi ba ba itsiseng batho mafoko ba nne bontsi jo bogolo.

¹²Dikgosi tsa dintwa di tshabe; di tshabe, mme mosadi yo o salang mo gae a abe thopo.

¹³Le fa lo lala mo marakaneng a dinku, go bo go ntse jaaka diphuka tsa lephoi tse di apesitsweng selefera, le dintlha tsa tsone ka gouta e tshetlha.

¹⁴E rile Mothatayotlhe a gasanya dikgosi gone, ga nna jaaka fa kapoko e na mo Salemone.

¹⁵A thaba ya Modimo, thaba ya Bašane! A thaba e e godileng thaba ya Bašane!

¹⁶Lona dithaba tse di godileng, lo dilolelang thaba e Modimo o e eleditseng gore e nne boago jwa one? Ee, Jehofa o tlaa aga mo go yone ka bosakhutleng.

¹⁷Dikara tsa Modimo di le dikete di le masome mabedi, e bong dikete tse di tlhatlaganyeng le dikete; Morena o mo go tsone, jaaka mo Sinai, mo felong ga boitshepo.

¹⁸O tlhatlogetse kwa godimo, o gogile botshwaro jwa gago bo tshwerwe; o amogetse dineo mo bathong, ee, le mo go bone ba e leng batsuolodi, gore Jehofa Modimo a tle a age nabo.

¹⁹A go bakwe Morena yo o rwalang merwalo ya rona ka malatsi, e bong Modimo o e leng poloka ya rona. Sela.

²⁰Mo go rona Modimo ke Modimo wa dikgololo; mme diphalodiso mo losong ke tse e leng tsa Morena, Modimo wa rona.

²¹Modimo o tlaa arola tlhogo ya baba ba one, e bong segata se se moriri sa yo o sa ntseng a tswelela mo melatong ya gagwe.

²²Morena o rile; Ke tlaa ba ke ba tlisa gape go tswa kwa Bašane, ke tlaa ba tlisa gape go tswa matenyeng a lewatle;

²³gore o tle o ine lonao lwa gago mo mading, gore diteme tsa dintšha tsa gago di bone seabe sa tsone se se tswang babeng ba gago.”

²⁴Ba bonye ditsamao tsa gago Modimo, e bong ditsamao tsa Modimo wa me, Kgosi ya me, di tsena mo felong ga boitshepo.

²⁵Baopedi ba ne ba etelela pele, ba ba letsang diletso ba ba sala morago, ba tsentswe gare ke barweetsana ba ba letsang meropana.

²⁶Bakang Modimo mo diphuthegong, e bong Morena, lona ba lo leng ba motswedi wa Iseraele.

²⁷Yole ke Benjamine yo mmotlana, mmusi wa bone, dikgosana tsa Juta di na le lekoko la tsone, dikgosana tsa Sebulune, dikgosana tsa Nafetali.

²⁸Modimo wa gago o laotse thata ya gago; Modimo, a ko o thatafatse sone se o se re diretseng.

²⁹Ka ntlha ya tempele ya gago e e kwa Jerusalema, dikgosi di tlaa tlisa dineo kwa go wena.

³⁰Kgalemela sebatana sa lotlhaka, bontsi jwa dipoo, di na le dinamane tsa ditšhaba; ba ne ba tle ba ineele ka dipapetlana tsa diselefera; o faladitse ditšhaba tse di natefelwang ke ntwa.

³¹Dikgosana di tlaa tswa kwa Egepeto; lefatshe la Ethopia le tlaa akofa le otlololela Modimo mabogo a lone.

³²Opelelang Modimo, lona magosi a lefatshe; a ko lo opeleleng Morena dipako, Sela;

³³e bong ene yo o pagameng magodimo a magodimo, a a sa leng a leo bogologolo; utlwang, o ntsha lentswe la one, mme e be e le lentswe le le thata thata.

³⁴A lo ko lo re: Thata ke ya Modimo; tlotlomalo ya one e okame Iseraele, thata ya one e kwa magodimong.

³⁵Modimo o a boitshega o le mo mafelong a gago a a boitshepo; Modimo wa Iseraele one, o naya batho ba one thata le nonofo. A go bakwe Modimo.